Xasan Sh Maxamuud oo Shirweyaha QM ka sheegay inuu muddo 2 sanno ah ku hirgelinayo Midnimadii Soomaaliya

New York, 28 Sept, 2014 (Himilo)- Madaxweynaha Soomaaliya Xasan Sheekh Maxamuud, ayaa ku baaqay in dalkiisu khatar ugu jiro amni-darro iyo deggenaansho la’aan wakhtigan soo food-saartay, waxaanu ku baaqay in la sii wado taageerada beesha caalamku ka geysato xoojinta ammaanka iyo dib-u-dhiska dalkiisa.
Xasan Sheekh Maxamuud oo khudbad ka jeediyey fadhigii 69aad ee Jimciyadda Quruumaha ka dhaxayso oo shalay ka furmay xarunta guud ee Qaramada Midoobay ku leedahay magaalada New York ee Maraykanka, waxa uu sheegay in Soomaaliya kaga dhabayn doono rabitaanka iyo taageerada beesha caalamku la garab-joogto, isaga oo sheegay in wakhti koobani ka hadhsan yahay Soomaaliya oo mar kale noqoto qaran jira oo loo midaysan yahay.
“Waxaanu leenahay waddan immika ku socda inuu u midoobo Qaran ahaan, annaga oo hindisahayagu in sannadka 2016-ka la helo Soomaaliya oo midaysan.”
Waxa uu sheegay in dawladdiisa Federaalka ahi guulo wax ku-ool ah ka gaadhay inay isu-keento isla markaana ay Soomaalida oo dhan wada-shaqayn kala yeelato geeddi-socodka siyaasadeed ee dhismaha qaranimada, hadday yihiin haweenka iyo dadka laga tirada badan yahay.
“Guushayadu waxay u baahan tahay taageerada saaxiibadayada adduunka, laakiin inteeda badani waxay u baahan tahay lahaanshiyaha iyo daacadnimada shacabka Soomaaliyeed.”
Khudbadda madaxweynaha Soomaaliya jeediyey, ayaa ku soo beegantay dhowr maalmood ka hor arrimaha Soomaaliya lagaga hadlay Shirweynaha Qaramada Midoobay oo ay ka soo qayb-galeen wufuud heer caalami ah.
Xoghayaha Guud ee Qaramada Midoobay Ban Ki-moon oo kulanka ka hadlay, ayaa xusay in dedaallada nabadeynta Soomaaliya u baahan tahay taageero gacmo wada-jir ah oo wax lagaga qabto, haseyeeshee waxa uu ka digay inay shaqo badani u hadhsan tahay wax ka qabashada dhibaatooyinka haysta Soomaaliya.
Madaxweynaha Soomaaliya waxa uu khudbaddiisa ku soo qaatay dhibaatooyin bani’aadamnimada oo soo waajahay dalkiisa, isaga oo xusay in 3.2 milyan oo shacabkiisa ahi macaluul u dhimanayaan isla markaana u baahan yihiin gargaar deg-deg ah oo nolosha lagu badbaadiyo.
Waddanka Soomaaliya oo taageero ka helay beesha Caalamka, ayaa la qorsheeyey in sannadka 2016-ka laga qabto doorashadii u horeysay ee shacabka dalkaasi si dimuqraaddi ah ugu dareeraan muddo Afartan Sanno, taas oo qayb ka ah yoolka dhinaca horumarka ee loo dejiyey in la gaadho xilligii la dhisay dawladda uu madaxweynaha ka yahay Xasan Sheekh Maxamuud sannadkii 2012-kii.
Himilomedia.com
Hargeysa-Somaliland