Britain Oo Hirgelisay Qorshe Ka Dhan Ah Soogelootiga Dalkeeda Kaga Imanaya Dalalka Yurub

London:Nov,28,2014(Himilo)-Dalka Britain ayaa shaaciyey qorshe cusub oo hoos loogu dhigayo dadka Soo Gelootiga ah ee kaga imanaya Dalalka kale ee isla midowga Yurub ka tirsan, kuwaas oo si xawli ah ugu gudba dalkaasi.

Arrintan oo Dalku si weyn uga fikirayey ayaa waxa ku dhawaaqay Ra’isal wasaare Cameron, waxana uu tilmaamay inay tahay tallaabo loo baahnaa oo lagama maarmaan ahayd xilligan.

Qorshaha Cameron ayaa waxaa kamid ah dadka kasoo guuraya dalalka kale ee Midowga Yurub ee raba inay degaan UK, in aan lasiin doonin lacagta Caydha 4-ta sano ee ugu horeysa.

David Cameron ayaa sidoo kale doonaya inuu wax ka bedalo lacagta lasiiyo dadka shaqada ka dhamaatay ee kasoo jeeda dalalka kale ee Midowga Yurub.

Halkaas kuma eka qorshaha Cameron wuxuu sidoo kale doonayaa in dadka soogalootiga ah ee aan shaqo ku helin muddo 6 bilood gudahood ah inay dalka UK isaga baxaan.

Hogaamiyaha UK ayaa sheegay in hadii qorshihiisan ay horjoogsadaan dalalka kale ee Midowga Yurub uu go’aamin doono in dowlada UK isaga baxdo Midowga Yurub.

Wuxuu qorshahan kusoo beegay Cameron xili ay muddo bilo ah ka hadhsan tahay doorashada guud ee wadanka UK, waxaana xisbiga Cameron culeys iyo loolan weyn uga imanayaa xisbiyada xagjirka ah ee kasoo horjeeda dadka soogalootiga ah sida UKIP.

 

Himilo Media