Xeerka Diiwaangelinta Codbixiyayaasha Oo Durduro Ku Dhaafay Golaha Wakiillada, Madaxweynahana Loo Gudbiyey

Hargeysa:Dec,06,2014(Himilo)-Mudanayaasha Aqalka Baarlamaanka Somaliland, ayaa Maanta Cod aqlabiyad ah ku Meelmariyey Xeerka Diiwaangelinta Madaniga iyo Codbixiyayaasha oo ay Golaha Guurtidu kaabis iyo wax kabeddel kusoo sameeyeen dhawaan.

Fadhigii Maanta ee Golaha oo uu Guddoominayey Guddoomiye Cabdiraxmaan Cirro, ayaa waxa fadhiyey 44-mudane waxana markii Kulanku furmay Guddoomiyuhu Mudanayaasha ku wargeliyey inay Xeerkaas Qodob qodob ugu codeeyeen, taas oo ay Mudanayaashu sameeyeen.

39-Mudane ayaa xeerkan ogolaaday, waxana uu Guddoomiyuhu Mudanayaasha ku wargeliyey in sida sharcigu dhigayo xeerkan loo gudbin doono Madaxweynaha Somaliland si loo saxeexo, maadaama uu yahay xeer Muhiim u ah in doorasho waddanka ka qabsoonto xilligii loogu talo galay.

Xeerkan ayaa ahaa midkii uu ka dhashay Buuqa iyo murankii keenay in Mudanayaashu laba garab u kala jabaan, waxana dhamaanba qoddobadii muranka keenay meesha kasoo saaray Aqalka Guurtida oo isagu keenay Xalkii arrintaas lagusoo af jaray.

 

 

Himilo Media