“Anigu waxaan u arkaa arrintaas Dekedda Berbera, wixii hore u dhici jiray uun…”

Hargeysa, 18 Feb, 2015 (Himilo)- Xildhibaan Siciid Warsame Ismaaciil (Gaani), oo ka tirsan Golaha wakiilada Somaliland, ayaa Shirkadaha caalamiga ah iyo kuwo waddaniga ahba uga digay inay wax heshiisyo ah la galaan Xukuumadda talada Somaliland haysa maaddaama oo wakhtiga u hadhay lix bilood ka yar yahay, waxaanu sheegay in heshiis kasta oo ay gasho wakhtigan aanu sharci noqon doonin.
Xildhibaan Siciid oo shalay Warbaahinta qaarkeed kula hadlay Hargeysa, waxa uu Sharci-darro ku tilmaamay wareejinta Dekedda Berbera, waxaanu yidhi; “Anigu waxaan u arkaa arrintaas Dekedda Berbera, wixii hore u dhici jiray uun mid ka mid ah, Iibkii, Xaalufintii, Siidh-geyntii ay Xukumaddu ku haysay Hantida Ummadda iyo Boobkii qayb cusub oo ka mid ah ayuun bay noqonaysaa. Runtii waa arrin aan la qaadan karin in Dekeddii oo innoogu dambeysay iyadiina la xaraasho.”
“Waxaan idiin sheegayaa 6 bilood wax ka yar ayaa u hadhsan Xukumaddan, Ansax maaha heshiisyada ay gashaa Runtii. Xukuumad ay 4 Bilood u hadhsan tahay iibkeeda iyo Heshiisyadeeduba Ansax ma noqonayaan. Dekeddaas hadda la wareejinayaa waxay ka mid noqonaysaa iibintii iyo boobkii hantida Qaranka ee aan cidna loo sheegin, haddii ay ahaayeen Wershadihii sida tii Laydhka, Dhulkii iyo Guryihii dawladda, waxbana ka tegi mayso.” Sidaa ayuu yidhi Xildhibaan Siciid Warsame.
Waxaanu Xildhibaan Siciid oo hadalkiisa sii watay intaas ku daray oo yidhi; “Waxaannu Shirkadaha Caalamiga ah iyo dadweynaha-ba u sheegaynaa Xukuumad 6 Bilood wax ka yari u hadhsan tahay Heshiiskeeda iyo iibkeeduba Ansax noqon maayo heshiiskeeduna Sharci ma noqonayo. Ganacsatada Lacagtooda iska gelinaya hantidaa Ummadda ee la boobayo waxaannu leenahay Lacagtiinna ha iska gelinnina Boobkaas aad arkaysaan ee aan Sharciga ahayn.”
Xildhibaanku waxa uu Xukuumadda ku eedeeyay inay tahay mid aan waxba ka dhegaysanayn Mucaaradka iyo Dadweynaha, isagoo sidoo kalena eedeeyay Golaha Wakiillada ee uu ka tirsan yahay oo uu sheegay inaanu doorkiisa qaadan, isla markaana intiisa badani ku biirtay oo ay gacan-saar la leeyihiin Aqalka Madaxtooyada.
Himilomedia.com
Hargeysa-Somaliland