Xukuumadda Oo Xorriyadoodii u Celisay Wariyayaal Toddobaadyo U Xidhnaa

Hargeisa:Nov,12,2014(Himilo)-Xukuumadda Somaliland, ayaa dib xorriyadoodii ugu soo celisay Laba wariye oo ka hawlgeli jirey TV-yo gaar loo leeyahay, kuwaas oo Muddo laba toddobaad ah ku xidhnaa Magaalada Gabiley.

Wariyayaashan Ayaa Kala Ahaa Wariye Mukhtaar Nuux Ibraahim Oo Ka Hawl Gali Jiray Tvga HCTV iyo Maxamed Sheekh Xasan Jubba oo u shaqaynayey Telefiishanka Somsat TV, waxana la sheegay in amarka xadhigoodu uu hore u bixiyey Badhasaabka Gabiley Mustafe Cabdi Ciise Shiine.

Ilaa iyo Haatan lama sheegin cidda Bixisay Amarka lagu soo daayey Wariyayaashan oo xadhigoodu xukuumadda ku kiciyey Mucaaridad ballaadhan oo kaga timi Bahda Saxaafadda, waxase lasii daayey iyadoo aan wax Maxkamad ah la horgeynin.

Wariyayaashan Ayey Hore Ay Xukuumada Talada Haysaa Xabsiga U Taxaabtay Ka Dib Markii Ay Soo Gudbiyeen Warar Ku Saabsan Dad Gubaya Calanka Xisbiga Talada Haya Ee Kulmiye, waxana warkaas si weyn uga cadhooday Xukuuumadda, gaar ahaan Badhasaabka Gobolka Gabiley oo ku baaqay in xadhig lala tiigsado.

 

Himilo Media