Xukuumadda oo sheegtay inay soo dhawaynayso Cid kasta oo Shidaal Jaban dalka Keenaysa

Hargeysa, 03 Jan, 2015 (Himilo)- Xukuumadda Somaliland, ayaa markii u horeysay shaaca ka qaadday inay u furan tahay cid kasta oo dalka keeni karta Shidaal ka jabay qiimaha shidaalka ay wakhtigan shirkadaha gaarka loo leeyahay ku keenaan dalka, isaga oo sheegay in hoos-u-dhac weyn oo dunida laga dareemay ku yimi qiimaha shidaalka.
Wasiirka Ganacsiga Somaliland Dr Muuse Qaasim oo shalay warfidiyeennada wax kaga weydiiyey sababta dalka looga dareemi waayey hoos-u-dhaca qiimaha shidaalka dunida, waxa uu sheegay in qiimaha Shidaalka hoos uga dhaca dunida, waxaanu yidhi, “Waa run in Shidaalka dunidu hoos u dhacay, Innaga Shidaalkeenna, Baadroolka waxaa la siin jiray markii uu ugu qaali sanaa foostada 175 Dollar, imikana waxa la siiyaa oo Berbera laga siiyaa 150 Dollar,markaas aniguba waan arkayaa inaan Isbedel weyni aanu halkan ka dhicin.”
Wasiirka oo shalay hortagay Golaah Baarlamaanka oo markii uu ka soo baxay warhbaahinta la hadlay, waxa uu sababeeyey waxa keenay inaanu hoos u dhicin Shidaalka dalku, waxaanu yidhi, “Sida aan golahaba ugu sheegay horena umaanaan heli jirin Rasiidhada ay wax ku soo Iibsadaan Qoladan Ganacsatada ah, haddana noomay keenin, iyaguna waxay sheegayaan inaanay waxba ka jabin, annaguna ma garan karayno Suuqan ay wax ka soo iibsadaan meel uu yahay.”
Isaga oo hadalkiisa sii wata, waxa uu intaas ku daray, “Wax isbedel ah oo Muuqda may sheegin Shirkaddaha Shidaalka keena laakiin,annigu mar walba waxaan u diyaar ahay Shidaalku cidna uma xidhna, cid ganacsiga Shidaalku gaar ugu xidhan yahay ma jirto,annigu waxaan aaminsanahay ciddii muwaadin ah ee Shidaal jaban keenaysa inay u furan tahay oo ay keeni karaan, looguna shubayo Haamaha Shidaalka, Muwaadiniinta wixii u jaban uun baa la qaadanayaa cidna loo xidhnaan maayo.”
Himilomedia.com
Hargeysa-Somaliland