Xukuumadda Somaliland Oo Ku Faraha Kala Baxday Markabkii Hubka Siday Iyo Cudurdaarka Lagusii Daayey

Hargeysa:Feb,03,2015(Himilo)-Xukuumadda Somaliland, ayaa saaka ku dhawaaqday inay fasaxday Markabkii Hubka siday ee muddada taagnaa Xeebta Somaliland, kaas ooh ore looga rogay Hub Sharcidarro ahaa oo uu siday.

Marakabkan oo lagu magacaabi jirey Mv Shaakir, ayaa 24-kii Bishii hore kusoo xidhay Dekedda Berbera, waxana si kedis ah loogu arkay Hubka saaran xilli uu halkaas ku rogayey Badeecad saarnayd, iyado taasi keentay in somaliland si kedis ah ugu dhawaaqdo in hub sharcidarro ah ay qabatay.

Wasiirka Arrimaha Dibada Somaliland Maxamed Biixi Yoonis ayaa sheegay in dowladda Sudan ay la soo xidhiidhay, isla-markaana Madaxweynaha Somaliland iyo midka Suudaan si toos ah arrimaha Hubkaas uga Wada Hadleen, taas oo keentay in markii dambe la fasaxo Markabkii iyo Hubkii saarnaaba.

“Madaxweynaha Sudan ayaa la soo xidhiidhay Madaxweyne Siilaanyo, wuxuu ka codsaday in hubkaas la sii daayo, warqad buu noo soo qoray, waxaana goosanay inaan fasaxno Markabkan, markii aan ku qanacnay warka nala soo siiyay, Sudan waa dal aan saaxibo nahay oo cilaaqaad badan uu naga dhaxeeyo”ayuu yidhi Wasiirka Arrimaha Dibada Somaliland.

Waxaa uu sheegay in dowladda Sudan ay soo cadeysay in Markabkan hubka sida ay iyadu leedahay, isagoo intaa ku daray in ganaaxii lacageed ee la dul saaray Markabkan ay ka cafiyeen, ayna sii deyn doonaan saacadaha soo socda.

Dowladda Sudan ayaa sheegtay in Markabkan hubka sida uu ku socday Imaaraadka Carabta, si uu uga qeyb galo Bandhig Hub ah oo ka dhici doona dalkaas.

Hubkan ayaa ka kooban hal madfac oo weyn oo dhuuuntiisu tahay 122mm, hal kaare, laba gawaadhida gaashaaman oo laga rido gantaalaha rocket-ka ah , laba baabuur oo ah nooca aan rasaastu karin, iyo hal doon oo ah nuuca dagaalka ah.

 

 

Himilo Media