Dagaal-Beeleed sababay Khasaare Dhimasho iyo Dhaawac isugu jira oo ka dhacay Degmada Hobyo ee Somaliya

Hargeysa, 02 Julay 2014 (Himilo)- Ugu yaraan saddex Qof, ayaa ku dhintay, shan kalena way ku dhaawacmeen dagaal shalay laba Malleeshiyo-beeleed ku dhex-maray degmada Hobyo oo ka tirsan gobolka Mudug ee waddanka Soomaaliya oo uu ka taliyo Maamul-goboleedka Soomaaliyeed ee Galmudug.

Dadka dhintay iyo kuwa dhaawaca ah ayaa lagu soo warramayaa inay ka kala tirsan yihiin labada Malleeshiyo-beeleed ee dirirtu dhex-martay. Waxa kale oo ay wararka qaar sheegayaan in Shanta qof ee dhaawacmay isugu jiraan dhinacyadii uu iska-hoirmaadku u dhexeeyay iyo dad shacab ah, iyadoo intii ay is-rasaaseyntu socotay uu xidhmay isu socodka dadka iyo gaadiidka ee degmadaasi.

Wasiirka Gaadiidka, Dekedaha iyo Kalluumeysiga Maamulka Galmudug Maxamed Aaden Qalab-xoor, ayaa Warbaahinta u xaqiijiyay iska-horimadka kooxahan hubeysan ku dhex-maray gellinkii dambe ee shalay gudaha degmada Hobyo.

Sidoo kale, Goob-joogayaal ku sugan degmada Hobyo, ayaa sheegay in dagaalkaasi uu daba socdo dil sannadkii hore gudaha degmadaas loogu geystay Taliyihii Ciidammada amniga ee degmadaas Cabdiweli Xasan Xersi.

Wasiirka Gaadiidka, Dekeddaha iyo Kalluumeysiga Galmudug, ayaa sheegay inay ku baxeen dagaalkaas Odayaal Dhaqan iyo Wax-garad si loo qaboojiyo xiisadda halkaas ka bilaabantay, isagoo rejo weyn ka muujiyay in xiisaddaas la dhammeynayo oo xaaladda degganaansho lagu soo dabbaali doono si dhaqso ah.

Maaha markii ugu horreysay ee kooxo hubeysani ay ku dagaallamaan degmada Hobyo oo ka mid ah deegaannada uu gacanta ku hayo Maamulka Galmudug oo ka arrimiya qaybo ka tirsan gobollada Mudug iyo Galguduud ee badhtamaha dalka Soomaaliya.

Xaaladda degmada Hobyo ayaa xalay dagganayd, iyadoo weli kooxihii dagaalku uu ku dhexmaray degmadaas ay kuwada sugan yihiin gudaha degmada, waxaana dadka deegaanku sheegayaan in dedaallo nabadeed ay magaalada ka socdaan, kuwaasoo la isugu soo dhawaynayo labada Beelood ee ay ka soo kala jeedaan Malleeshiyo-beeleedyada halkaas ku diriray shalay.

 

Himilomedia.com

Hargeysa-Somaliland