Nuxurka Qodabbo lagu Soo Af-jaray Xurguf u Dhaxaysay Laba beelood iyo Dareen-celinta Madaxda Dhaqanka

Burco-(Himilomedia.com)- Shir nabadeed u socday beelaha Buuhoodle iyo Bariga Burco oo dhawaan shaqaaqooyin ku dhexmareen deegaanka Kalshaale, ayaa lagu soo afjaray tuulada Coodanle oo ka tirsan gobolka Buuhoodle, waxaana laga soo saaray qodobbo gun-dhig u ah nabad waarta ka tisqaadda deegaamadaas.
Shir-jaraa’id oo shalay ay ku qabteen magaalada Burco Odayaal iyo wax-garad ka tirsan Beesha Bariga Burco, ayaa lagu sheegay in kulamo gogol xaadh oo labada dhinac ugu qabsoomay deegaannada Coodanale iyo Xadhadhanka laga soo saaro qodobbo ay wax-garadka labada beeloodba ku qanceen.
Waxa ugu horeyn shirkaas Jaraa'id ka hadlay Suldaan Maxamuud X. Xuseen Nuur, waxaana hadalkiisa ka mid ahaa, “Anagu waxaanu ka nimi deegaankii ay Shaqaaqadu ka Dhacday,in badan baanu isku hawlay laakiin Illaahay mahaddii haduunbay noo qabsoontay, labadii dhinacba si ay ka muuqato inay nabdgelyo u baahanyihiin ayaa ka arkaysay, waxaana laysla qaatay nabadcaam ah iyo xabad joojin iyo in wacyi galin la sameeyo," ayuu yidhi Suldaan Maxamud X. Xasan
Waxa halkaas laga akhriyey lix qodob oo la sheegay inay isla qaateen wax-garadka iyo madax-dhaqameedka labada beelood, kuwaas oo ay ka mid yihiin: 1) Nabadgelyo iyo Xabad joojin. 2) Waxaa la dhaariyay Laba iyo Afartan isugu jira labada dhinacba. 3)Waxaa laysla qaatay Gogol nabadeed iyo Shir Danbe. 4) Meesha shirka labaad ka Dhacayaa Waa Coodanle. 5) Mudada la qabtay Ee lagu balamay Waa 20/2/2014 ilaa 20/4/2014 iyo 6) In la sameeyo Wacyi-Galin Nabadeed Oo dadka lagu wacyi galiyo.
Dhinaca kale, wax-garad ka soo jeeda deegaanka Buuhoodle oo warbaahinta la hadlay, ayaa dhankooda faahfaahin ka bixiyey nuxurka waxyaabaha ay labada dhinacba ku qanceen ee shirka ka soo baxay.
Caaqil Cabdisamad Cali Xasan oo ka mid ahaa ergada beelaha Buuhoodle ee shirka ka qayb-galay, ayaa sheegay in la isla qaatay afar qodob oo kala ahaa: Xabad joojin, 21 xubnood oo la dhaariy, Shir la isugu yimaado 20-ka bisha Abriil ee sannadkan iyo in la sameeyo wacyigelin dhinaca ammaanka ah.
Madaxdhaqameedka halkaasi joogay ee guddoonka lahaa ayuu caaqilku sheegay inay kala ahaayeen: Garaad Cabdullaahi Garaad Soofe, Suldaan Maxamuud Guuleed, Garaad Saleebaan Bullaale iyo Suldaan Maxamuud Xaaji Xuseen.
Sidoo kale, Caaqil Cali Cabdi oo ku hadlayay magaca madaxda dhaqanka iyo cuqaasha ayaa ku dhaawaaqay in laga billaabo wakhtiga shirku soo xidhmay beelaha colaaddu sannadaha badan dhex-taalay ay yihiin nabad, ciddii garab martana masuuliyadda wixii kaga yimaadda ay keligeed qaadayso. Himilomedia.com
Hargeysa-Somaliland