Xukuumadda oo ugu baaqday Mucaaradka inay ku Garab-joogsadaan dagaalka Siyaasadeed ee Soomaaliya

Hargeysa, 12 July, 2014 (Himilo)- Xukuumadda uu hoggaamiyo Madaxweyne Axmed Maxamed Maxamuud, ayaa Axsaabta mucaaradka ah ee dalka ka dalbatay inay ku-garab istaagaan dagaalka ka dhanka dhinaca maamulka Hawada sare ee Somaliland kula jirto dawladda Somaliya oo doonaysa inay gacanta ku dhigta maamulka Hawada dal-weynihii laysku odhan jiray Jamhuuriyadda Soomaaliyeed oo gacanta ugu jira Qaramada Midoobay.

Wasiirka Wasaaradda Duulista iyo Hawada Somaliland Md Maxamuud Xaashi Cabdi, ayaa sheegay in ay masuuliyiiinta Xisbiyada mucaaradka ah waajib ku tahay inay Xukuumaddu ku garab-joogsadaan dagaalka ay ugu jiraan Arrimaha khuseeya danaha Qaranimada.

“Marka dagaal lagu jiro, waa in masuuliyiinta Mucaaradku na garab galaan oo ay na taageeraan oo ay dagaalka bar-daamiyaan,”ayuu yidhi Mudane Maxamuud Xaashi Cabdi.

Axsaabta Mucaaradka ah, ayaa siyaabo kala duwan ugu dhaliilay Xukuumadda inay ka cago-jiidayso inay tallaabada ugu habboon kaga jawaab-celiso ballan-furka ay dawladda Soomaaliya kaga baxday heshiisyadii lagu gaadhay wada-hadalladii u socday labada dal oo maamulka Hawada Sare ku jirto.

Xisbiga UCID iyo WADDANI waxay ugu baaqeen xukuumadda inay isaga baxdo wada-hadallada Somaliya maadaama ay Xukuumadda Muqdisho ku qancisay Qaramada Midoobay inay kala wareegto maamulka Hawada Sare.

Himilomedia.com       

Hargeysa-Somaliland