Muwaadin Reer Kuwait ah Oo Muddo 13-sano ah Kadib Laga Sii Daayey Xabsiga Guantanamo

Kuawait:Nov,06,2014(Himilo)-Muwaadin u dhashay Dalka Kuwait oo maraykanku gacanta ku hayey, isla-markaana Hawlo Argagixiso lagu xidhiidhiyey, ayaa muddo 13-sano ah kadib laga soo daayey xabsiga caanka ah ee Guantanamo.

Muwaadinkan oo lagu magacaabo Fawzi,ayaa fasax loo siiyey inuu dib ula midoobo dadkiisi, isla-markaana uu dalkiisii Hooyo ku noqon doono isla xilligan.

Fawzi al-Odah ayaa ka mid ahaa maxaabiista waqtiga ugu dheer ku xidhnayd xabsiga Mareykanka uu ku leeyahay Cuba.

Hadda waxaa la geynayaa xarunta dhaqan celinta milateriga ee Kuwait, halkaas oo la isku dayi doono in nolosha dib loogu soo celin doono, maadaama uu muddo badan jeel ku jiray.

Garyaqaankiisa ayaa sheegay in aanu qabin wax xumaato ah oo la xidhiidha xidhitaankiisa, oo uu ku faraxsan yahay in uu dib ugu soo laabto dalkiisa.

Mr al-Odah ayaa laga qabtay waqqooyiga Pakistaan iyadoo lagu eedeeyay in uu xidhiidh dhaw la lahaa Ururka Al-qaacida.

Madaxweyne Obama weli ma hirgelin balanqaadikiisii hore ee ahaa in uu xidhayo xabsiga Guantanamo Bay oo ah meel muslimiinta adduunku aad u Neceb yihiin.

 

Himilo Media