Maanso Ka Hadleysa Dhibaatada Duqeynta iyo Gumaadka Yuhuudu Ku Hayso Dadka Reer Falastiin

Maansadan waxa la yidhaahdaa QASA, waxaanay ka hadlaysaa sida magaceeda ka muuqata dhibaatada, duqaynta iyo gumaadka ay Yuhuuddu ku hayso dadka reer Falastiin. Waxa curisay Yaasmiin Maxamed Kaahin, waxaanay ifka u soo baxday maansadani 04/08/2014.

Baqaha ma taqaan kashaydu

Xaashee mana baraq nuglaanin

Bilaale ibriiq ma moodin

Xaqana kama biqin odhaahe

Sidii  utun beer ku taalla

Waxaa boog igu samaysay

Qasaay waa baylahdaada

Banbaanaha kugu dhacaaya

Barbaartaa kugu dhammaatay

Maatadaa lagu beegsanaayo .

Badday xidhay inoo dhaxaysa

Buurahaa hakadkaygu keenay

Inaan kuu soo baqoolo

Haddaan barta aad ku taallo

Haddaan beleddada agtaada

Haddaan Balastiin ku noolay

Billaawaha maan gafeene

Dhulkaa baac iga fogaaday.

 

Hadday boqoradii carbeed

Sidii baraar saylad yaalla

Galbeed kala baayacaayo

Hadday ka baxeen bahdaada

Haddii Masar loo baryaayo

Sebiga biyo lagu habaayo

Ilmaha basanbaasku haysto

Cuntiyo dawadii bukaanka.

 

Adduunyadan baaxaddaas leh

Baawarka nimankaa ku faana

Buruudkiyo xoogga sheegta

Ninkii baal mara dantooda

Ku baaqa muquunintiisa

La booba cuno-qabatadiisa

Boqollaal maydkaaga dhaafay

Burburka sarahaaga daatay

Bini’aadannimo daa warkeede

Iyaga bayr kuma abuurin,

Baraakna codkaa ka yeedhay

Maraykan badheedhihiisa

Hadduu Yuhuud baasha saaray

Buunbuuniyay inay xaqooda

Iska baacinayaan caruurta

Baxnaano kuwaad filaysay

Haddii dhinacood bannaanyay

Talada boqorkaa u dhiibo.

Belaayada laguma waaro,

Dhibtiyo burburkiyo halaaggu,

Bunduqu dhaxalkaaga maaha.

Aqsiyo Baytulaxam dhacooda,

Yuhuudi ku badhaadhi mayso,

Sidii Boqorkeenba sheegay,

Guuliyo barkhad baa xigaysa.

 

Adaa Boqoroow maqlaaya,

Adaan baaq laguu diraynin,

Adaa ka bogtoo arkaaya,

Waxaa hoog iyo ba’ haysta,

Hooyada baroortiyo catowga,

Miciin iyo awood bidaysa,

Gurboodka boggood dillaacay,

Baaniyo dawadiiba waayay,

Aday baryadiyo dhawaaqa,

Aday birmad kaaga tuugaan.

 

Adaa Baasidoow awood leh,

Halkii bugta adaa bogsiiya,

Qofkii baahanna wax siiya,

Qofkii ku baryana ajiiba,

Qasiyo Balastiin dhibkooda,

Adaa baaxadloo karaaya,

Inaad beddeshood ka qaaddo,

Gumaysiga barriinsaanaya,

Yuhuuddana baaba’eeda,

Jabkiyo hooggiyo ba’eeda,

Basiiroow adaa karaayee,

Allow beritaba ka yeel.

 

 

Waxa curisay: Yaasmiin Maxamed Kaahin

Email: qalinbila01@gmail.com

Hargeisa, Somaliland.

Himilomedia.com