Jamaal Cali Xuseen oo ka hadlay Saamayn Weedhaha Siyaasadeed ee Hoggaanka UCID ku yeelan karaan Hankiisa Madaxtinimo

Muxuu ka yidhi farqiga u dhexeeya Awooddiisa Xisbiga ee xilligan iyo haddii uu ku guulaysto Madax-tinimada?

Hargeysa, 09 Dec, 2014 (Himilo)- Murashaxa Madaxweynaha ee Xisbiga UCID Aqoonyahan Jamaal Cali Xuseen ayaa bulshada ka codsaday inaanay ku qiimayn hadallada madaxda UCID qaarkood ku hadlaan ee la dhibsado, balse lagu qiimeeyo Xisbiga lagu qiimeeyo shakhsiyaddii iyo wixii isaga Afkiisa ka soo yeedha, waxaanu ballan-qaaday tallaabooyin iyo shuruuc uu ku soo rogi doono haddii xisbigu hoggaanka dalka ku guulaysto.
Jamaal Cali Xuseen waxa uu ballan-qaaday inuu hakamayn doono hadallada masuuliyiinta iyo qofka kasta oo xisbiga UCID ku abtirsada haddii xilka Madaxtinimada ku guulaysto, maadaama uu markaa leeyahay awood ku maamuli karo hadallada is-dhex-yaaca ee inta badan lagu dhaliilo madaxda Xisbiga UCID.
Md. Jamaal oo dhowaan magaalada Minneapolis ee Maraykanka ka qayb-galay kulan jaaliyadda Somaliland ee dalkaasi ku marti-qaadday oo su’aalo lagu weydiinayey, waxa uu gef iyo meel-ka-dhac ku tilmaamay hadal Gud-xigeenka saddexaad ee UCID Mujaahid Cali Maxamed Yuusuf (Cali-Guray) ku duray Guddoomiye ku-xigeenak kowaad ee Golaha Wakiillada Md. Baashe Faarax oo uu ku tilmaamay inuu siyaasadda Kooxda Khaatumo qayb ka yahay, xilligii uu sucday khilaafkii sharci ee muxaafidka iyo mucaaradka u qaybiyey Golaha Wakiillada.
Jamaal Cali Xuseen oo ka jawaabayey su’aal laga weydiiyey sida uu u arko hadal Mujaahid Cali-Guray ku sheegay in Guddoomiye Baashe Maxamed Faarax ka tirsan yahay Kooxda Khaatumo, waxa uu yidhi, “Anigu, arrinkaas waxaan u arkayey deelqaaf, wax wanaagsan ma ahayn. Guddoomiye Xigeenka Koowaad ee Baarlamaanka Baashe waa nin Somaliland ah, waa nin baarlamaanka ku jira, runtiina waxay ahayd inuu si yar oo kale ula hadlo. Waxaan u maleynayaa in xamaasaddii jirtay ay la jiidhay Cali Guray odhaahdaa. Wax badan ayey reer Somaliland isyidhaahdaan, haddana aakhirka, gacmahaa lays qabsadaan, waa inta aynu dheernahay Soomaalida kale.”
Musharaxa madaxweyne ee Xisbiga UCID, Md. Jamaal oo ka jawaabey su’aal laga weydiiyey sababta uu weli Gudoomiye Faysal Cali Waraabe u hayo xilka Xisbiga ama u wareejin waayey, waxa uu ku jawaabay, “Waa run Faysal waa wejigii xisbiga UCID, waa aasaasayaashii xisbiga, laba jeer waa la soo tijaabiyey, hadhow doorashada marka la gelayo saddex nin ayaa tartamaya, Faysal halkaa istaagi maayo ee anigaa istaagaya, annaa kaambaynkayga wadanaya, laakiin Faysal waa guddoomiyihii xisbiga, waaya-arag weeye,” ayuu yidhi Jamaal Cali Xuseen.
Mar la weydiiyey Su’aal nuxurkeedu ahaa sida lagu aamini karo haddii ay talada dalka ku guulaystaan maadaam madaxda xisbiga UCID hadalo kala duwan ku hadlaan, waxa uu yidhi, “Adeer markaa madaxweyne ayaan ahay oo awood baan leeyahay ciddaan doono waan aamusiin karaa, Imikase musharax baan ahoo cid walba annaa u baahan, ilayn runtaa fiican in dadka loo sheegee. Immika ma aamusiin kartid dadka, markay madax xisbiga ah yihiin. Inaan arrin isku mid ah anniguna si uga hadlo, Faysalna si uga hadlo, Cali Gurayna si uga hadlo ma dhacdo, laakiin annigaa musharax ah ee haddii wax gef ahi iga dhacaan igu qiimeeya, laakiin qof kale oo xisbiga ah waxuu yidhi ha igu qiimaynina,” ayuu yidhi Jamaal Cali Xuseen.
Himilomedia.com
Hargeysa-Somaliland