Dumarka Sucuudiga Oo Halgan Ugu Jira Waddidda Gawaadhida Oo Aanay Fasax u Haysanin

Riyad:Dec,08,2014(Himilo)-Waxa sii kordhaya Cadaadiska ay xukuumadda waddanka sucuudigu ku Hayso Haweenka isku daya inay Gaadiidka kaxaystaan, waxana Toddobaadkii dhammaaday xabsiga la dhigay laba haween ah oo isku dayey inay Gawaadhi kaxaystaan.

Haweenka la xidhay ayaa waxaa kamid ah gabadh 25 sano jir ah oo lagu magacaabo Luqiyan Al Xathluul, waxayna haweenaydan sharciga gawaadhi wadista kasoo qaadatay dalka Imaaraadka Carabta, kadibna waxay iyadoo gaadhi wadda kasoo gashay xaduuda u dhaxeysa Imaaraatiga iyo Sucuudiga.

Gabadhan ayey gacanta ku dhigeen ciidamada illaalada xaduuda oo Baasaboorkeedii ka qaaday, waxaana xabsi ku yaal xaduuda lagu hayey muddo 24 saac ah.

Waxaa kadib goobtaasi tagay gabadh kale oo lagu magacaabo Maysa Al Camudi oo 33 sano jir ah, taasi oo cunto iyo cabitaan u waday gabadhii la xidhay. Balse ciidamada ayaa sidoo kale xabsiga u taxaabay haweenaydan labaad oo iyadana lagu eedeeyey inay gaadhigeeda gacanteeda ku wadatay.

Dalka Sucuudiga ayaa waxa laga mamnuucay innay dumarku gaadhiga kaxaystaan, arrimo la Xidhiidha Xagga Diinta, waxana arrintaas halgan ka dhan ah ku jira Haween tiro badan oo doonaya in loo fasaxo waddista Gaadiidka oo ay u arkaan wax ay xaq u leeyihiin.

 

Himilo Media