Maxamed Kaahin oo Sheegay in Xukuumaddu dhammaystirtay Ballan-qaadkii KULMIYE, hadda waxay qabanaysaana dheeraad ku yahay

Hargeysa, 03 Dec, 2014 (Himilo)- Guddoomiye Ku-xigeenka koowaad ee Xisbil-xaakimka KULMIYE Maxamed Kaahin Axmed, ayaa sheegay in waxyaabihii ku qornaa Buuggii Cagaarnaa ee Barnaamij-siyaasadeedka Xisbigu ku soo galay doorashada ee uu ballan-qaaday inuu qabanayo haddii uu guulaysto ay Xukuumadda Madaxweyne Siilaanyo dhammaystirtay, isla markaana hadda wixii ka dambeeya ee ay qabataa yahay wax ku saayid ah ballan-qaadkii codka lagu siiyey.
Maxamed Kaahin Axmed oo shalay hadal ka jeediyey Munaasibad Madaxweynaha Somaliland xadhigga kaga jaray dhisme cusub oo loo dhisay Wasaaradda Boosaha iyo Isgaadhsiinta, waxa uu sheegay in dhismayaal tiro badan oo cusub oo xaruntaa loo dhisay Wasaaradda Boosaha ee shalay la furay iyo kuwo badan oo ka horreeyey iyo kuwo hadda dhammaanayaba ay hirgelisay, kuwaasoo isugu jira Xafiisyadii ay Ingiriisku ku shaqayn jireen xornimadii ka hor iyo kuwii laga maamuli jiray Waqooyi-Galbeed wakhtigii Somaliland ay ka midka ahayd dalkii Jamhuuriyadda Soomaaliya la isku odhan jiray.
Guddoomiye Ku-xigeenka koowaad ee Xisbiga talada haya ee KULMIYE Maxamed Kaahin Axmed oo ka hadlaya wixii KULMIYE Bulshada u ballan-qaaday ololihii in Xukuumaddu dhammaystirtay, waxa uu yidhi; “Had iyo Jeer Asxaabta Siyaasiga ah looma dhisto uun inay meelahan is-jiid-jiitaane, waxa loo dhistaa Asxaabta Siyaasiga ah inay soo bandhigaan waxay doonayaan inay dalkan ku hoggaamiyaan oo ah Barnaamij Siyaasadeed, dhaqaale, wax-qabad iyo nabadgelyo oo ay Bulshada ku hoggaamiyaan, KULMIYE kaasuu soo bandhigay, Barnaamijkii KULMIYE wuu dhammaaday, anigaa sidaas leh oo Guddoomiye Ku-xigeenkiisa koowaad baan ahay, waxa immika sannadka inta yari ka hadhay ay qabanayso Xukuumadda KULMIYE waa saayid ka badan Barnaamijkii uu soo bandhigay.”
Maxamed Kaahin waxa uu sheegay inay Xukuumadda KULMIYE ee Madaweyne Siilaanyo hoggaamiyaa tahay tii ugu wax-qabadka badnayn muddadii ay Somaliland jirtay, isla markaana ay dhistay Xafiisyada Wasaaradaha iyo Hay’adaha kale ee dawladdu ku shaqeeyaan, Waddooyinka, horumarinta Dhaqaalaha, Ciidammada iyo adeegyo badan oo horumarineed oo wixii ay ku ballan-qaadeen KULMIYE ahaan iyo Madaxweyne ahaan ah markii ay ololaha doorashada ku jireen 2010-kii. “KULMIYE Xisbi Mucaarad ah buu ahaa, Xukuumadduu wax ka sheegayey, Saaxiibbadayada Asxaabta (Mucaaradka ah) waxaannu leenahay dee Daarahan lama dafirayo.” Sidaa ayuu yidhi Guddoomiye Ku-xigeenka koowaad ee KULMIYE Maxamed Kaahin.
Himilomedia.com
Hargeysa-Somaliland