Maxkamad Maraykanka Ku Taalla Oo Xukun Adag Ku Ridday Muwaadin Soomaali ah Oo Arrimo Argagixiso Lagu Xidhiidhiyey

Austin:Feb,06,2015(Himilo)-Muwaadin Soomaaliyeed oo magaciisa lagu sheegay Cabdinaasir Maxamuud Ibraahim, ayaa Maxkamad dalka Maraykanka ku taalla ku ridday Xukun dheer, kadib markii lagu eedeeyey arrimo argagixiso.

Muwaadinkan, ayaa lagu xukumay muddo 15-sano ah, waxana, xukunkiisa laga soo xigtay Bahda Caddaalada ee Dalka Maraykanka.

Sida ay qortay Warbaahinta Maraykanku C/naasir Max’ud Ibraahin waxa cimrigiisa lagu sheegay 43-jir, waxana lagu eedeeyey inuu dhaqdhaqaaqa Al-shabaab u fidiyey taageero dhaqaale.

Dacwad oogayaasha ayaa maxkamada hor keenay qoraalo ay sheegeen inay kasoo saareen E-mail,ka C/naasir kuwaasoo ay ku sheegeen inuu kaga hadlay taageero dhaqaale oo uu u diray hogaamiyaal sar sare oo Al-Shabab ka tirsan iyo arrimo ku saabsan dhalinyaro Al-Shabab loo tababarayay.

Sidoo kale dacwad oogayaasha ayaa sheegay in kiiska C/naasir Max’ud Ibraahim oo soo bilawday bishii July ee sanadkii hore inuu warar been abuur ah u sheegay hay’addaha sirdoonka dalkaasi.

Soomaali aan tiro yareyn oo dambiyo kala loo haysto ayaa ku xidhan xabsiyada dalka Maraykanka qaarkoodna dacwadahooda ayaa maxkamadaha dalkjaasi ka socda.

 

Himilo Media