Guddoomiyaha Guurtida oo ka hadlay Rejadiisa Doorashooyinka, Dhawaaqa Mucaaradka iyo Xanta Muddo-kordhinta

Hargeysa, 26 Feb, 2015 (Himilo)- Guddoomiyaha Golaha Guurtida Somaliland Md Saleebaan Maxamuud Aadan, ayaa ka hadlay dhawaaqyo maalmihii u dambeeyey ka soo yeedhayey xisbiyada mucaaradka oo ku baaqay in xukuumad ku-meel-gaadh ah la dhiso haddii doorashooyinku wakhtigooda dib uga dhacaan, waxaanu hadalkooda ku tilmaamay mid aan munaasib ku ahayn wakhtigan maadaama aan la joogin wakhti doorasho.
Guddoomiye Saleebaan waxa uu sheegay inaanay Gole guurti ahaan soo gaadhin wax muddo-kordhin ah oo xukuumadda loo samaynayo, haseyeeshee waxa uu iftiimiyey in talo-qaran iyo wada-tashi loo dhan yahay laga yeelan doono wixii la yeelayo haddii doorashadu wakhtigeeda ku qabsoomi weydo.
Md Saleebaan Maxamuud Aadan oo shalay warbaahinta kula hadlay Hargeysa, waxa uu dhawaaqyada mucaaradka ku sheegay inay ka soo horjeedaan shuruucda dalka isla markaana ay ku hadlayaan hadallo aan munaasibad ku ahayn wakhtigan, waxaanu u dooday in cid kasta oo xilligan arrimo doorasho ka hadasha ay falal amni-darro ka abuurayso dalka.
“Doorashooyinka ninka maanta wad-wada, waa nin Kicin wada, doorasho wakhtigeedii ma joogto. Marka la gaadho wakhtigeeda, haddii la qaban kari waayo wakhtigeeda haddii la qaban-kari waayo, markaasay tahay in laga tashado. Laakiin, maanta waxan aan arkayaa ee lagu waashay, aniga iima taal, golahaygana uma taalo. Waxaan u arkaa uun nin wax duqlaalinaya iyo nin doonaya codkaaga hala maqlo, dee hala gaadho,” Sidaas ayuu yidhi Guddoomiye Cirro.
Guddoomiyaha oo hadalkiisa sii watay, waxa uu yidhi, “Haddii la qaban kari waayo (Doorashada), markaa qaranku waa tashanayaa, waddadiisa loo marona, qaranku waa yaqaanaa, dastuurkaa iyo sharciyaddaa qaranka u taala uun baa loo raacayaa. Ninkii wax kale ku riyooda, isagaa cirka caano ku og.”
Guddoomiye Saleebaan oo la weydiiyey in aragti ahaan aaminsan yahay ifafaalo muujinaya doorashooyinka oo wakhtigooda ku qabsooma, waxa uu ku jawaabay, “Guddigii doorashadu waxba nama odhan, madaxweynihiina annaga waxba nama odhan, markay xaggaas ka soo dhammaato (Muddo-kordhin), ayuunbay timaaddaa Guurtida,” sidaas ayuu yidhi Guddoomiye Saleebaan Maxamuud Aadan.
Himilomedia.com
Hargeysa-Somaliland