Ujeeddada Safar Madaxweyne Siilaanyo Maanta Ku Gaadhay Magaalada Berbera

Berbera:Feb,23,2015(Himilo)-Madaxweynaha Jamhuuriyadda Somaliland Axmed Maxamed Maxamuud Siilaanyo iyo Wafti Kooban oo uu hoggaaminayo ayaa saaka safar ku tegay Magaalada Berbera, waxana ay diyaarad kaga dhoofeen Garoonka Caalamiga ah ee Cigaal International Aiport.

Madaxweyne Siilaanyo, ayaa sida wararku sheegayaan socdaalkiisani salka ku hayaa sidii uu xadhiga uga jari lahaa Terminal cusub ee Garoonka Diyaaradaha Berbera lagu kordhiyey iyo waliba dhagax dhigida mashaariic dhawr ah oo xukuumadda Meelo kala duwan oo magaalada ah ka hirgelin doonto.

Madaxweynaha ayaa Indho Indhayn uu ku sameeyay Qaybaha Madaarka kadib waxa uu ka qayb galay Munaasibad loo qabtay Xadhig ka jarista Madaarka Berbera oo si rasmi ah u shaqayn doona wixii hadda ka dambeeya.

Madaxweynaha ayaa Dawladda Kuwait uga mahadceliyay maalgalinta dib u dhiska lagu sameeyay Madaarka Berbera. waxa uu sheegay in baahi weyn loo qabay dib u dhista iyo casriyaynta Madaarka Berbera.

Sidoo kale waxa la filayaa inuu Madaxweynuhu booqan doono Dekedda Berbera oo dhawaanahanba warar soo baxayey sheegayaan in lagu wareejin doono Shirkado shisheeye inkastoo xukuumaddu arrintaas beenisay.

Safarka Madaxweynaha ayaa waxa ku wehelinaya Marwadiisa, Wasiirrada Wasaaradaha Duulista Hawada iyo Qorshaynta, waxana la filayaa inuu maalmo kooban qaadan doono.

 

Himilo Media