Midawga Yurub oo Markii u horreysay Qirtay in Ciidamo ka joogaan gudaha Soomaaliya, waxa ay qabtaan iyo tiradooda

London, 28 Feb, 2015 (Himilo)- Midawga Yurub, ayaa markii ugu horreysay si cad u qirtay in Ciidammo ka joogaan gudaha Soomaaliya, kuwaasoo ay sheegeen in ujeeddadoodu tahay inay tabobbarro iyo talooyin siiyaan Ciidammada dawladda Federaalka Soomaaliya.
Ergayga Midowga Yurub u qaabbilsan Soomaaliya Michele Cervone d'Urso, ayaa markii ugu horreysay caddeeyey in Waddamada ku midoobay Ururka Midawga Yurub ay Ciidammo ka joogaan gudaha Soomaaliya. Michele Cervone d'Urso oo wareysi gaar ah shalay siiyay Laanta Afka-Soomaaliga ee Idaacadda BBC, ayaa sheegay in Ciidammadaasi ay Soomaaliya u joogaan in ay tababaraan, isla markaana talo siiyaan Ciidammada dawladda Soomaaliya.
“Waxa jirra 150 Askari Millateri ah oo ka socda Midawga Yurub oo ku sugan gudaha dalka Soomaaliya, kuwaasoo tabobbarro siiya Ciidammada dawladda Soomaaliya ee ku jira Xerada Jasiira, waxay talooyin siiyaan Wasaaradda Gaashaandhigga Soomaaliya iyo Taliska Ciidammada dawladda Federaalka.” Sidaa ayuu yidhi Wakiilka Midawga Yurub u qaabbilsan Soomaaliya Michele Cervone d’Urso.
Waxaanu intaas ku sii daray; “Waxaanay sidoo kale Ciidammadaasi kala shaqeeyaan dawladda sidii la isugu dhafi lahaa Ciidammada Federaalka Soomaaliya ee ka kala imanaya gobollada kala duwan ee Soomaaliya. Waxa jira Maraakiib ay Ciidammada Badda Midawga Yurub wataan oo Xeebaha Soomaaliya u jooga ilaalinta iyo la-dagaallanka Budhcad-badeedka, kuwaasoo ah Ciidammada ugu badan ee Yurub kaga maqan dibedda, isla markaana guulo fiican ka gaadhay hoos-u-dhigista hawlgallada Budhcad-badeedda.”
Wareysiga oo dhinacyo badan taabanaya ayaa sidoo kale waxa uu Ergaygu ku sheegay in ay ku rejo weyn yihiin in Soomaaliya ay doorasho ka dhacdo sannadka 2016-ka. Waxaanu su’aalo laga weydiiyey suuragal-nimada doorashooyinkaas 2016-ku ka dhici karaan gudaha Soomaaliya, ayuu sheegay in muhiimaddu tahay inaanu Soomaaliya hoggaamin Madaxweyne ay Odayaal soo doorteen, balse ay wacan tahay Madaxweyne Shacabku soo doortay uu hoggaamiyo.
Hase-yeeshee, mar la weydiiyey maaddaama oo sannad wax dhimani ka hadhsan yihiin 2016-ka, intii ay dawladdan dunidu aqoonsatay ee Soomaaliya jirtay-na Raysal-wasaaraha hadda xilka hayaa yahay kii saddexaad oo laba Raysal-wasaare oo Madaxweyne Xasan Sheekh markay isku dhaceen, lana hubin in Raysal-wasaaraha hadda jooga iyo Madaxweynuhu isku dhici doonaan iyo in kale. Waxa uu sheegay in kulammo iyo wada-tashiyo uu la yeeshay Madaxweynaha, Raysal-wasaaraha iyo Guddoomiyaha Baarlamaakna Federaalka-ba ay ugu caddeeyeen inaan khilaaf dambe iman doonin, si looga midha-dhaliyo qorshaha iyo heshiiska higsiga cusub ee (New Deal) ee dhex-maray Soomaaliya iyo beesha caalamka ee caawimooyinka u fudiya.
Inkasta oo uu xusay inuu ku rejo-wayn yahay in si khilaaf la’aan ah lagu gaadho 2016-ka, waxa uu Sheegay Danjiruhu inaanu dammaanad qaadi Karin isagu in khilaaf iman doono iyo in kale, balse Midawga Yurub iyo beesha caalamka-ba ay ka go’an tahay wax la qabashada dawwladda iyo Shacabka Soomaaliya, iyo inay kala shaqeeyaan hirgelinta doorashooyin Shacabku cidda hoggaaminaysa si xor ah ugu soo dooran karaan.
Himilomedia.com
Hargeysa-Somaliland