Golaha Guurtida oo Meelmariyey Xeerka Hay’ad Dhismaheedu Muhiimad weyn ugu fadhido Qaranka

Hargeysa, 17 Sept, 2014 (Himilo)- Golaha Guurtida Somaliland, ayaa fadhigoodii shalay ku meel-mariyey Xeer loo sameeyey hay’ad muhiimad weyn ugu fadhida dhismaha iyo maamulka hay’adaha dawladda, taas oo shaqadeedu noqon doonto dib-u-habaynta iyo dib-u-eegista shuruucda dalka.

Fadhiga shalay ee Golaha Guurtida oo uu shir-guddoominayey Guddoomiyaha Golahaas Saleebaan Maxamuud Aadan, waxa ay mudaneyaasha Goluhu cod aqlabiyad ah ku ansixiyeen Xeerka Komishanka Dib-u-habaynta Shuruucda Dalka oo ay wax ka beddel ku sameeyeen Guddida Dastuurka iyo Shuruucda ee Guurtidu, ka dib markii ay u soo gudbiyeen Golaha Wakiillada oo hore u ansixiyey.

Waxa fadhiga shalay lagu ansixiyey Xeerkan goob-joog ka ahaa 44 xildhibaan oo ka mid ah 82-ka Mudane ee Golaha Guurtidu ka kooban yahay, waxaana xeerkan ogolaaday 41 mudane halka 2 xildhibaan ee kalena ay codkooda kaga soo horjeesteen ansixinta xeerkan, guddoomiyuhu ma codayn, sidaasina uu xeerku ku ansaxay.

Komishanka dib-u-habaynta Shuruucda Dalka ee shalay xeerka dhismahooda la meel-mariyey oo aan hore uga jirin dalka, ayaa muhiim weyn ugu fadhiyaa dhismaha hay’adaha dawladda iyo Shuruucda waddanka.

Himilomedia.com

Hargeysa, Somaliland