Madaxweyne Silaanyo Oo Soo saaray Xeer Uu Ku Abuurayo Waaxda Ilaalada Sahaminta Iyo Soo-saarista Shidaalka Ee Ciidanka Booliska Somaliland

Hargeysa (Himilo) Madaxweynaha Somaliland Axmed Maxamed Maxamuud (Silaanyo ) ayaa soo saaray xeer madaxweyne oo uu ku abuuray amase ku aasaasayo waaxda ilaalada sahaminta iyo soo-saarista shidaalka dalka somaliland, oo noqonaya ciidan cusub oo ka tirsanaan doona ciidanka booliska, isla markaana si wada jir ah looga soo xulayo ciidamada milatariga iyo booliska.
War-saxaafadeed ka soo baxay xafiiska af-hayeenka madaxtooyada ayaa lagu cadeeyay in madaxweyne Silaanyo soo saaray xeerka abuurida, aasaasida waaxda ilaalinta sahaminta soo saarista shidaalka ee ciidanka booliska, war-saxaafadeedkaasi oo dhameystirani waxa uu u dhignaa sidatan:-
WAR-SAXAAFADEED
Madaxweynaha Jamhuuriyada Somaliland, Mudane. Axmed Maxamed Silaanyo waxa uu Xeer madaxweyne oo sumadiisu tahay JSL/M/XERM/249-2800/092014, ku abuuray, Aas-aasidda Waaxda Ilaalada Sahaminta iyo Soo-saarista Shidaalka ee Ciidanka Booliiska.

Madaxweynuhu

Markuu Arkay: Qodobada 123aad iyo 124aad ee Dastuurka Jamhuuriyadda Somaliland oo lagu aas-aasay Saddexda Ciidan Qaran;

Markuu Arkay: Faqradda 4aad ee Qodobka 90aad ee Dastuurka Jamhuuriyadda Somaliland oo qoraya in Madaxweynuhu yahay Taliyaha Guud ee Ciidammada Qaranka;

Markuu Arkay: Xeerka Nabadgelyada iyo Anshaxa Guud Xeer Lr. 51/2011

Markuu Arkay: Faqradda 4aad ee Qodobka 12aad ee Dastuurka Jamhuuriyadda Somaliland oo sheegaya in khayraadka Dabiiciga ah ee Dalka ay mas’uul ka tahay Dawladda Dhexe.

Markuu Tixraacay: Dedaaladda Xukuumaddu ugu jirto daah-furka khayraadka debiiciga ah iyo ka faa’iidaysiga khayraadka debiiciga ah iyo ilaalintiisa;

Markuu Garawsaday: Baahidda loo qabo xoojinta Amniga Goobaha iyo cid kasta oo ku hawlan Sahaminta iyo Soo-saarista Khayraadka Dabiiciga ah ee Dalka;

Wuxuu Go’aamiyey

Aasaasidda Waaxda Ilaalada Sahaminta iyo Soo-saarista Shidaalka (Oil Protection Unit) oo laga soo xulayo Ciidammada Milateriga iyo Booliiska, kana tirsanaan doona Ciidanka Booliiska oo hoos yimaada Wasaaradda Arrimaha Gudaha (Line Ministry), Xubnaha iyo qaab-dhismeedkiisana uu jaan-goyn doono Taliyaha Ciidanka Booliisku marka uu la tashado Wasiirka Wasaaradda Arrimaha Gudaha iyo Wasiirka Wasaaradda Gaashaandhigga.

ALLAA MAHAD LEH
Himilomedia.com
Hargeysa-Somaliland