Qaar ka mid ah muwaadiniintaas oo ah dhalinyaro ayaa lagu qabtay howl-galadii ciidamada kenya ka sameeyeen xaafada Islii, waxaana wareysi ay siiyeen Idaacada BBC-da ay kaga hadleen in xaalad aad u liidata ay ku jiraan.Mid ka mid ah dhalinyaradan oo lagu magacaabo C/qaadir ayaa wareysi uu siiyay Idaacada BBC-da ku sheegay in dhibaado aad u daran ay heysato, gaar ahaan xaga nolosha, waxaana uu xusay inuu heysto waraaqda aqoonsiga ardaynimada, taasna aan lagu tixgelin oo ay ciidamadu diideen, kadibna la xidhay.
“Aniga Arday baan ahaa, halkan ayaan wax ku baranayay, ciidamada markey i qabteen waxaan tusay kaadhka aqoonsigeyga ardaynimo, wey diideen, waana i xidheen”ayuu yidhi C/qaadir.
Sidoo kale waxaa uu aad uga cawday xaalada nololeed ee halka ay ku jireen, isagoo xusay in iyagoo sooman aanay helin raashin ku filan, waxaana uu intaa ku daray in gabdho la xayiran oo muddo labo bilood ku dhow xidhan ay xabsiga dhexdiisa ka baroortaan, isla-markaana aanay cidina waxba u qabanin.
Dhinaca kale Safiirka Soomaaliya u fadhiya Kenya Maxamed Cali Ameerika ayaa wareysi uu siiyay BBC-da waxaa uu ku sheegay in dadka ku xiran Kazarani ay gaadhayaan ilaa todobo ruux, isla markaana ay ku booqdeen, waxaana uu xusay in kenya uu kala hadlay.
“Dadka ku xidhan Kazarani waa todobo ruux, kumanaan ruux ayaa hore wax ugu qabanay, dowladda Kenya waa kala hadalnay, waxaana lagu qabtay sharci daro, qaarkood sharciga Kenya ayay heystaan ciidamada ayaa baadhaya, kuwa kaadhadhka ardaynimo heysta ee iskuulada ma aha kaadhadhk aqoonsiga sidaas ha u ogaadaan”ayuu yidhi Maxamed Cali Ameerika.
Kenya ayaa labadii bilood ee u dambeysay dalkeeda ka soo musaafurisay dad boqolaal ruux ah oo si sharci daro dalkeeda ku joogay, waxaana jiray dhibaatooyin ay ka cabanayeen Soomaalida oo isugu jiray jidhdil, boob iyo dhibaatooyin kale.
Himilo Media
No comments:
Post a Comment