Ciidamada qaranka Somaliland Oo Gacanta Ku Dhigay Gaadhigii Gaarka ahaa ee Cali Khaliif Galaydh

Hargeysa:July,25,2014(Himilo)-Ciidamada Qaranka Somaliland ayaa sheegay inay gacanta ku dhigeen Gaadhigii khaaska ahaa ee uu watay Xildhibaan Cali Khaliif Galaydh  oo  ku hawllan dhaqdhaqaaqyo ka dhan ah Somaliland.

Warka qabashada gaadhiga cali khaliif oo laga baahiyey Idaacadda Radio Hargeysa, ayaa lagu sheegay in ciidanka qaranka ee aagga Saax-dheer ay xalay gacanta ku dhigeen gaadhiga Xildhibaanka oo mabda’ ahaan ka soo horjeeda Somaliland.

Warka idaacaddu sii daysay ayaa u dhignaa sidatan:

“Cutub-yada Ciidanka Qaranka Somaliland eek u Sugan Aagga Saax-dheer waxay Gacant ku dhigeen Badhtamihii Xalay Gaadhigii Dagaal Ooge Cali Khaliif Galaydh, iyadoo Ilaaladiisuna Saaran tahay. Tani waxay digniin u tahay Dagaal Ooge Kasta”.

 

Warkan oo uu ku saxeexnaa Taliyaha Ciidanka Qaranka Sareeye Gaas Ismaaciil Maxamed Cismaan(Shaqalle) ayaan lagu Caddayn in Gaadhiga la qabtay uu la socday Cali Khaliif Galaydh iyo in kale.

 

Taliyaha Ciidanka Qaranka ayaa sheegay inuu uga mahadcelinayo Ciidanka Waajibaadkooda Qaran ee ay guteen.

 

Cali Khaliif Galaydh oo ka mid ah Hogaamiyeyaasha Kooxda Khaatumo, isla-markaana ah xildhibaan ka tirsan Baarlamaanka Dawladda Federalka Somalia, ayaa mudooyinkii u dambeeyay dhuumaalaysi ku jooga Degmada Saax-dheer ka dib markii Taleex Ciidanka Qaranka Somaliland ka saaray.

Himilo Media