Cabdiraxmaan-Cirro oo sheegay inay Garashada iyo Garaadka Shacabka gef ku yihiin Dacaayadaha la rabo in laga dhaadhiciyo

“Waa Been-abuurkii ugu weynaa ee Qarnigan ay Saxaafadda qaar samayso…Warqaddan Foojariga ah Ingiriisi ayaa lagu qoray, waxaana hoosta lagaga qoray Magaca Guddoomiyaha Golaha iyo Allaah Mahad leh oo Af-Soomaali ah.” Xoghayaha guud ee Golaha Wakiillada Somaliland
“Xisbiga WADDANI wuxuu markasta ixtiraamayaa Axsaabta Qaran & Masuuliyiiinta Qaran dhammaantood, waxaanannu diyaar u nahay doorasho Xor iyo Xalaal ah oo aan Xagxagasho lahayn…” Guddoomiye Cabdiraxmaan Maxamed Cabdillaahi (Cirro)
Hargeysa, 28 April, 2015-(Himilo):- Guddoomiyaha Golaha Wakiillada, ahna Guddoomiyaha Xisbiga Mucaaradka ah ee WADDANI Cabdiraxmaan Maxamed Cabdillaahi (Cirro), ayaa Dacaayado iyo been-abuur Shacabka lagu marin-habaabinayo ku tilmaamay warar ay Saxaafadda dalka qaarkood ka faafiyeen oo sheegaya inuu Madaxweynaha Soomaaliya kula kulmay Turkiga iyo in uu dawladda Finland u diray Warqad qoraal ah oo uu ku caddeeyey haddii uu doorashada ku guulaysto inuu taageeri doono nidaamka Federaalka Soomaaliya oo ay Finland ka mid tahay dawladaha hirgelinta nidaamkaas dedaalka weyn geliyey.
Guddoomiye Cabdiraxmaan-Cirro oo qoraal kooban shalay ku baahiyey Bartiisa Facebook ee uu ku leeyahay Shabakadda Internet-ka, ayuu ku sheegay inay Shacabka Somaliland ka garaad iyo garasho badan yihiin dad dacaayad iyo been-abuur xaqiiqada ka fog laga dhaadhicin karo, isla markaana yihiin dad bisil oo aan rumaysan karin waxa ay Xisbiyada cod-ka dadweynaha ku kalsoonayn inay heli karaan ku mashquulinayaan sida uu hadalka u dhigay.
Qoraalkaas uu Guddoomiyaha Golaha Wakiillada ahna Guddoomiyaha WADDANI Cabdiraxmaan-Cirro baahiyey, waxa uu u dhignaa sidan:- “Been-abuur kasta & Dacaayado loo sheego Shacabka qiimaha leh ee Somaliland waa qaar aan Cidna wax u tarayn, siina raagayn. Haddii lays leeyahay Dacaayado ayaa Shacab wax lagaga dhaadhicinayaa ama lagu soo jiidanayaa, taasi waa mid gef ku ah Caqliga & Garaadka Shacabkeenna.
Shacabkeennu wuxuu usoo joogay waqtiyo doorashooyin oo badan iyo Xisbiyo aan Kalsooni badan ku qabin Codka Shacabka. Xisbiga WADDANI wuxuu markasta ixtiraamayaa Axsaabta Qaran & Masuuliyiiinta Qaran dhammaantood, waxaanannu diyaar u nahay doorasho Xor iyo Xalaal ah oo aan Xagxagasho lahayn.” Sidaa ayuu qoraalkiisa kooban ku yidhi Guddoomiye Cabdiraxmaan Maxamed Cabdillaahi (Cirro).
Sidoo kale, Xoghayaha guud ee Golaha Wakiillada Somaliland Cabdirisaaq Siciid Ayaanle, ayaa dhankiisa been-abuur ku tilmaamay Warqaddaas Guddoomiyuhu ka jawaabay oo ay shalay Wargeysyada qaar baahiyeen ee lagu sheegay in Guddoomiye Cirro u diray Finland kuna sheegay inuu qaadan doono hannaanka Federalka ee Soomaaliya hadduu xilka Madaxtinnimo ee Somaliland qabto.
Xoghayaha Wakiillada oo Shir Jaraa’id shalay ku qabtay Xafiiskiisa xarunta Golaha Wakiillada, ayaa arrintan ka hadlay, waxaanu yidhi; “Warqaddani waxay ka hadlaysaa Xisbiga WADDANI oo leh markaannu ku guulaysanno Xilka Waddanka waxaannu qaadanaynaa Federaalka Soomaaliya. Warqaddan la been-abuuray ama Foojariga lagu sameeyay waa warqad uu leeyahay Qaranku. Waa foojarigii ugu darnaa ee Qarnigan ee Saxaafaddu baahiso.”
Cabdirisaaq Siciid Ayaanle, waxa u intaas kusii ladhay oo yidhi; “Warqaddan foojariga ahi ma laha Tixraacii Golaha Wakiillada. Waxa kale oo aad arkaysaa halkii Waraaqaha Golaha lagaga qori jiray tixraaca oo lagu qoray taariikhdii. Warqaddan Ingiriisi ayaa lagu qoray waxaana hoosta lagaga qoray Magaca Guddoomiyaha iyo Allaa Mahadleh oo Af-Soomaali ah.”
Himilomedia.com
Hargeysa-somaliland