Faysal Cali Waraabe oo Sheegay in Guddoomiyaha Guurtida oo ay Ergo ugu tageen si Masuuliyadi ku jirto u aqbalay

“Guurtidii waad aragtaan, Odayaashii maanta gurman lahaa ee Axsaabta kala dhex-geli lahaa ee waxa loo sameeyey ay taas ahayd ee Guurti magac qaatay ahaa, ayaannu annagu Ergo ugu tegnay inaanay dalka khalkhal gelin, halkaynu maanta maraynaana waa halkaas.” Guddoomiyaha UCID Eng. Faysal Cali Waraabe
Hargeysa, 29 April, 2015-(Himilo)- Guddoomiyaha Xisbiga Mucaaradka ah ee UCID Eng. Faysal Cali Waraabe, ayaa sheegay inay Ergo ugu tageen Guddoomiyaha Golaha Guurtida Saleebaan Maxamuud Aadan oo ay kala hadleen inaan muddo-kordhinta Madaxtooyada iyo Golaha Wakiillada sannadka ay dib uga dhacday xilligeedii hore wax ka badan aanay kordhin, waxaanu intaas ku daray in Guddoomiyuhu si fiican ula hadlay oo uu aqbalay.
Guddoomiyaha UCID waxa uu sheegay in Baarlamaanka Somaliland ay noqdeen kuwo aan Hay’ad ahaan u dhisnayn, balse ay ku mashquuleen keliya inay noqdeen Gole dantiisa gaarka ah uun ka shaqeeya, Guurtida lafteedu doorkeedii dayacday, isagoo xusay inay Shaqadii Guurtidu lahayd Ergo uga noqdeen iyaga oo ah Xisbiyada Mucaaradka ah.
“Waad arkaysaan oo Baarlamaankii aynu dhisnay ma shaqaynayo, dantiisuu ka shaqaynayaa. Guurtidii waad aragtaan, Ergo ayaannu shalay (dorraad) ugu tegnay Guddoomiyaha Guurtida si fiican buu noo aqbalay, hadallo fiican oo masuuliyadeed buu jeediyey, waxaannu uga ergo ahayn inaan doorashadaas wakhtiga farsamo ee la kordhiyey aan la dhaafin.” Sidaa ayuu yidhi Guddoomiyaha UCID Eng. Faysal Cali Waraabe.
Guddoomiye Faysal Cali Waraabe oo shalay hadal ka jeediyey Kulan Qado-sharaf ah oo uu u sameeyey Garabka Haweenka UCID oo Hargeysa lagu qabtay, waxaanu Faysal oo sii watay hadalkiisa intaas ku daray oo uu yidhi; “Odayaashii maanta gurman lahaa ee Axsaabta kala dhex-geli lahaa ee waxa loo sameeyey ay taas ahayd ee Guurti magac qaatay ahaa, ayaannu annagu Ergo ugu tegnay inaanay dalka khalkhal gelin, halkaynu maanta maraynaana waa halkaas.”
Guddoomiyaha UCID waxa uu ku baaqay in la kala saaro qabyaaladda iyo Masuuliyadda Qaranka, isla markaana la illaaliyo dhismaha dawladnimo, isagoo xusay inuu soo moosay beeno badan oo laga sheegay Somaliland oo dalalka caalamka looga gudbiyey, inkasta oo aanu fasirin noocyada beenahaasi ahaayeen. Waxaanu shacabka ugu baaqay inay ku dedaalaan midnimada, wada-jirka iyo degganaanshaha dalkooda inaan cidina wiiqin, iyaguna wiiqin.
HIMILOMEDIA.COM
HARGEYSA-SOMALILAND