Wefti dawladda Somaliland ka socda oo xallinta Colaad laba Beelood ku dhex-martay Xaysimo u tegay magaalada Taleex

“Somaliland umay iman wax kale, umay iman duullaan, waxay u timi dadkeeda inay kala celiso, xil baana ka saaran in dadkeedu nabad ku wada noolaadaan…” Wasiirka Khayraadka Biyaha Somaliland
Taleex, 29 April, 2015-(Himilo)- Wefti Xukuumadda Somaliland ka socda, ayaa gaadhay magaalada Taleex ee xarunta gobolka Xaysimo, waxaanay halkaas u tageen dejinta iyo nabad ku soo dabbaalidda iska-hor-imaad laba Beelood oo gobolka wada dega ku dhex-maray Deegaankaas, halkaasoo uu Ciidanka Qaranku hore u gaadhay, isla markaana kala dhex-galay labada Beelood ee dagaalku dhex-maray.
Weftigan shalay gaadhay magaalada Taleex ee xarunta gobolka Xaysimo oo uu hoggaaminayey Wasiirka Khayraadka Biyaha Somaliland Baashe Cali Jaamac, waxaa ku weheliyey Guddoomiyaha gobolka Maroodi-jeex, Xildhibaan Saleebaan Cali Koore, Xildhibaanno iyo Masuuliyiin kale oo laamaha dawladda ka tirsan iyo weliba Aqoonyahaniin u dhashay deegaankaas, waxaana soo dhaweeyey Masuuliyiinta heer gobol, degmo, Odayaasha dhaqanka iyo dadweynaha reer Taleex.
Xildhibaan Saleebaan Cali Koore oo ka mid ah Mudanayaasha Golaha Wakiillada Somaliland ee u dhashay Taleex, Weftiga gaadhayna xubin ka ah, ayaa halkaas kala hadlay Masuuliyiinta, Odayaasha iyo Shacabka soo dhaweeyey, waxaanu yidhi; “Waxaan mudnaanta siinayaa Ciidammada Qaranka Somaliland oo nabadda aan hadda halkan ku fadhino u sabab ahaa, Odayaashaa Hargeysa ka yimi ayaannu nahay, wixii Ciidanku nooga soo horreeyey ayuun baannu u soconnaa oo ah in deegaankani uu noqdo mid nabdoon. Wixii tegay waa tageen, waxaananu ALLAAH ka baryeynaa in nabaddu innoo hirgasho.”
Wasiirka Khayraadka Biyaha Baashe Cali Jaamac, ayaa sheegay inay dawladda Somaliland ka adkaysan wayday colaadda deegaankaas ku dhex-maraysay labada Beelood ee Walaalaha ah ee isku deegaanka ah toddobaadkii hore, waxaanu yidhi; “Weftigan aan anigu hoggaaminayo waxaa mahaddiisa leh Madaxweynaha Jamhuuriyadda Somaliland, annaga oo ah Masuuliyiintii deegaankan ka soo jeeday annaga ayaa Madaxweynaha Somaliland ka codsannay inuu Ciidanka Qaranku halkan yimaaddo.”
“Raggayaga halkan marayaa waxaannu u soconnay dawladda Somaliland way ka adkaysan wayday waxa halkan ka dhacayey. Somaliland umay iman wax kale, umay iman duullaan, waxay u timi dadkeeda inay kala celiso, xil baana ka saaran in dadkeedu nabad ku wada noolaadaan.” Sidaa ayuu yidhi Wasiirka Wasaaradda Khayraadka Biyaha Somaliland Baashe Cali Jaamac oo hoggaaminayey Weftiga dawladda Somaliland ka socda ee degmada Taleex socdaalka nabadeed ku jooga.
HIMILOMEDIA.COM
HARGEYSA-SOMALILAND