Madaxweynaha oo ka hadlay Falkii Askarigu ku toogtay Saraakiisha Ciidanka, tacsina u diray Marxuumka ku geeriyooday

Hargeysa, 13 August, 2015 (Himilo)- Madaxweynaha Somaliland Md. Axmed Maxamed Maxamuud (Siilaanyo), ayaa ka hadlay dhacdo Salaasadii dorraad uu Askari ka tirsan Ciidanka Qaranku toogasho dhimasho iyo dhaawac sababtay u geystay Sarkaal ciidanka Qaranka ka tirsan iyo taliyihii Aagga Galbeed ee Ciidanka Qaranka Somaliland.

Madaxweyne Siilaanyo waxa ciidanka qaranka, ehelkii, qaraabadii  uu ka baxay ka tacsiyadeeyay geerida Alle ha u naxariistee Xiddigle Marxuum Faarax Caraale Waabari oo u geeriyooday falkaas.

Sidaasna waxa lagu sheegay dhambaal tacsi ah oo ka soo baxay Xafiiska afhayeenka madaxtooyada, kaa oo u qornaa sidan:- “Madaxweynaha Jamhuuriyada Somaliland, Mudane, Axmed Maxamed SiIlaanyo ayaa tacsi u diray, Saddexda Ciidan qaran gaar ahaan ciidanka Militeriga oo uu ka tacsiyadaynayo geerida ku timid ALLE ha u naxariistee Xidigle Marxuum Faarax Caraale Waabari oo 11/08/2015, (Salaasadii) u geeriyooday toogasho uu u geystay mid ka mida ciidanka qaranka, halka uu dhaawac culusi soo gaadhay taliyihii aaga galbeedka Gaashaanle sare Xasan Caqli oo hada lagu daawaynayo Cusbitaal ku yaal Jabuuti, madaxweynuhuna waxa uu ALLE uga baryayaa inuu caafimaad sareecana siiyo sarkaalka.

Sidoo kale waxa uu madaxweynuhu tacsi taa la mida u dirayaa Qoyskii, Eheladii, Qaraabadii, Asxaabtii iyo shacbiga Somaliland, waxaanu Madaxweynuhu marxuumka Alle uga baryayaa inuu naxariistii jannatu fardawsa ka waraabiyo, ciidamada kala duwan ee qaranka Somaliland, Qoyskii, Eheladii, Qaraabadii, Asxaabtii iyo shacbiga Somaliland ee uu ka baxayna Samir iyo iimaan saadiqa ka siiyo. IN-NAA LILLAAHI WA IN-NAA ILAYHI RAAJICUUN,” Sidaas ayaa lagu yidhi dhambaalka tacsida ah ee ka soo baxay xafiiska afhayeenka madaxtooyada.

Himilomedia.com

Hargeysa-Somaliland