Waa fiid ay dabayl yar oo qaboobi afarta jiho mid ka mid ah kasoo bibbanayso, Tiraba dhawr hablood oo si heer sare ah u labbisan ayaa hor taagan sabbada intarnaytku ku yaallo, si habboon oo habsami leh ayey u sheekeysanayaan, waxaana si toos ah u haya iftiinka meheradda ay hortaagan yihiin. Kobta ay tuban yihiin waxa si qumman uga soo horjeeda sabbad kale oo iyana tukaanno iyo wax la mid ahi ku yaallaan. Gabdhuhu way isla maqan yihiin, sheekaduna waxa ay u maraysaa hirrar dhexe, si baraad la’aan ahna wey isugu fooggan yihiin. In door ah kaddib waxa ay isha ku dhufteen nin gaaban, buuran oo aad u xoog badan, oo laye xaggooda soo eegaya. Lays eeg oo la is weydii ninkaas.
_“ naa ma innaga ayuu ina soo eegayaa?”, ayey mid hablihii ka mid ahi tidhi.
_“ jabnay! Haa malaha” ayey mid kale ugu jawaabtay.
Wax yar ka dibna waxa ay arkeen ninkii buurnaa oo sida miigga kusoo gannan, xaggoodana usoo ordaya-jagac markaas ayey middiba meel ka dhacday. Ninkii laftarkiisu wuu yaabay, haa amakaagay isna weydiiyey: “tolow hablahaa maxaa ku dhacay”, kama qasna’e inta uu aadyar iska soo gucleeyey ayuu meheraddii internaytka daf yidhi, wax yar kaddibna hablihii halkoodii ayey ku soo laabteen iyaga oo hiinraagaya, dabadeed ay bilaabeen in ay ka sheekeystaan wixii eryaday iyo sidii uu u eryaday.
Ninkii ahaa kuu ahaa, inta uu is hayn waayey oo uu meheraddii kasoo booday ayuu ku ydihi “naa maxaa idin helay ee aad la yaacdeen” midbaa ugu jawaabtay “adigu maxaad naga eryanaysay” mid kale oo halkan taagan oo iyana beerka is haysa ayaa cod hiinraag ah ku tidhi “Annagu dumar baanu nahayoo ciddii na eryataba waanu ka carrarnaa” Inta uu yaabay, haddana ka fajacay jawaabteeda fudud ee mukurka miidhan ah oo uu iska dhaqaaqay ayuu sii yidhi “ annaguna rag baanu nahayoo ciddii naga carrartaba waanu eryanaa”.
W/Q: Rashiid Khadar Jaamac “Halac”
Email : h-halac@hotmail.com
Himilomedia.com
Hargeisa-Somaliland
No comments:
Post a Comment