Xukuumadda oo Shacabka ugu baaqday in La Sameeyo Agabkii Beddelka u noqon lahaa Isticmaalka Bacaha oo muddadii loo qabtay Berri ku egtahay

Hargeysa, 13 August, 2015 (Himilo)- Wasiirka Ganacsiga iyo Maalgelisha Dr Muuse Qaasim Cumar, ayaa shaaca ka qaaday inay dhammaatay muddadii madaxweynaha Somaliland u qabtay in isticmaalka iyo ka-ganacsiga Bacaha lagaga joojiyo dalka, waxaanu shacabka iyo ganacsatada ugu baaqay in laga hawl-galo sidii loo keeni lahaa agabkii isticmaalkiisa beddelka u noqon lahaa.

Dr Muuse Qaasim waxa uu sheegay in isticmaalka iyo ka-ganacsigeedu ka xaaraan yihiin dalka wixii ka dambeeya 14-ka bisha August oo Jimcaha Berri ku beegan, waxaanu shacabka ugu baaqay inay xukuumadda kala shaqeeyaan sidii dalka looga tir-tiri lahaa isticmaalka bacaha oo uu sheegay inay halis ku hayso bilicda magaalooyinka, Xoolaha iyo deegaankaba.

“Bacaha waatii la manuucay, waxaana maalintaas sida digreetada ku qornayd loo qabtay 120 maalmood oo noqonaaya afar bilood, waxay ahayd bishii afraad ee sannadkan. Haddaba bishan aynu ku jirno Afar iyo tobankeeda ayuu wakhtiga bacdu ku ekaa, waa xaaraan maalintaas waxii ka danbeeya ka ganacsigeeda, wax-ku-ridashadeeda iyo isticmaalkeeda oo dhan,” Sidaas ayuu yidhi Dr Muuse Qaasim oo shalay war-fidiyeennada kula hadlayey xafiiskiisa.

Wasiirka oo hadalkiisa sii watay, waxa uu intaas ku daray oo yidhi, “Waxaanu ganacsatada iyo shacbiga Somalilandba u sheegayaa in muddadii 120-ka cisho ahayd ay dhammaatay, ka ganacsigeeda iyo wax ku qaadashadeeduba way xaaraantinimoobeen. Hore ayaynu u soo sheegnay dhibaatooyinkeena oo bilicda ayay qaribaysaa, xoolaha ayaa cunaya oo ku dhinta, waa wax sun ah kun sannadoodna waa ay sii noolaanaysaa oo ma dhimanayso, waana qashinkaas caafimaadka u daran, markii dhan waba laga eegayna waxa laysla gartay in bacdaas sidooda lagu joojiyo.”

Wasiirku waxa uu shacabka iyo ganacsatada ugu baaqay inay dalka keenaan ama diyaariyaan agabkii lagu beddeli lahaa isticmaalka bacaha, “Waxaanu ganacsatada iyo shacabkaba ka codsanaynaa inay keenaan wixii lagu beddeli lahaa, shaqo ayaana uga furmaysa dumarkeenii yaqaanay farsamada ee samayn jiray Salladaha, kuwii kiishashka samayn jiray. Dowladaha Hoose iyo ciidanka booliska ayaana u xilsaaran fulinta amarkaas, wasiirka arrimaha gudahuna wareegtooyin ayuu u kala dirayaa. Qofkii iibinaya ee lagu qabto iyo ciddii meel ku qarsatayba, sharciga ayaa la horgaynayaa, dekedaha dalkana iyaga waa laga joojiyay oo kama soo dagto,” Sidaas ayuu yidhi Dr Muuse Qaasim.

Himilomedia.com

Hargeysa-Somaliland