Boqolaal Tahriibayaal ah oo ku geeriyooday Xeebta Liibiya, Tirada la badbaadiyey iyo wararkii u dambeeyey

Rome, 29 August, 2015 (Himilo)- Ugu yaraan 82 qof oo carruur iyo dumar u badan ayaa ku dhintay in ka badan boqol qofna waa la la’yahay, kaddib markii Doontii ay saarnaayeen Tahriibayaal ku sii jeeday Qaaradda Yurub ay ku qarraqantay Xeebaha dalka Liibiya Khamiistii dorraad.

Ururka Bisha Cas ee dalka Libya, ayaa Jimcihii shalay sheegay inay badda ka soo saareen meydadka 82 qof, tiro ku dhow 200 oo qofna la badbaadiyey.

Sida ay sheegeen saraakiisha ammaanku, Doonida qarraqantay oo ay saarnaayeen ku dhowaad 400 qof ayaa ka shiraacatay magaalada Zuwarah oo ah magaalada dhinaca Galbeed ugu Xigta dalka Liibiya xuduudka u dhexeeya dalka Tunisia, taas oo Xarun u noqotay doonyaha ay raacaan tahriibayaasha sida sharci-darrada ah ku gala qaaradda Yurub.

Balse war-murtiyeed shalay ay soo saartay hay’adda Qaramada Midoobay u qaabilsan Qaxootiga ee UNHCR, ayaa lagu sheegay in tirada muhaajiriinta Dooniga raacday ahaayeen 500 qof oo sida laga soo xigtay saraakiisha laamaha ammaanka Liibiya u kala dhashay dalalka ka hooseeya Saxaaraha ee Afrika, Pakistan, Marocco iyo Bangledesh.

Isla maalintii Khamiista dorraad, waxa geeriyooday 71 qof oo meydadkooda laga helay gaadhi xamuul ah oo qufulan, kaas oo la dhigay waddo laami ah meel u dhow xadka dalka Austria ee qaaradda Yurub la wadaado dalka Hungry.

War-murtiyeedka UNHCR ayaa lagu sheegay in muhaajiriin tiradoodu gaadhayso 300,000 qof  sannadkan gudihiisa ka tallaabeen badda Mediterranean-ka ee u dhaxaysa qaaradaha Yurub iyo Afrika, isla markaana ay ku geeriyoodeen tiro gaadhaysa 2,500 qof.

“Tani waxay ina tusinaynaa inay ka badan tahay tirada sannadkii hore oo gaadhaysay 219,000 qof,” sidaas waxa lagu sheegay war-murtiyeedka UNHCR shalay soo saartay.

 

Himilomedia.com

Hargeysa-Somaliland