Dilal Qarsoodi Oo Gudaha Dalka Ukrain Loogu Geystay Xubno Taageersanaa Ruushka

Kiev:April,17,2015(Himilo)-Caasimadda Dalka Ukrain ee Kiev waxa kusii kordhaya dilal qorshaysan oo loo geysanayo Xubno muwaadiniin ah oo lagu tuhmayo inay taageeraan Waddanka Ruushka.

Suxufi Oles Buzyna ayaa shalay duhurnimadii lagu dilay badhtamahaa magaalada Kiev kadib markii ay rasaas ku fureen koox aan la aqoon.

Dilkan ayaa kusoo beegmaya maalin kadib markii isla magaalada lagu dilay xildhibaaan isaguna kamid ahaa taageerayaasha Ruushka.

Xildhibaan Oleh Kalashnikov, ayaa Arbacadii laga helay irida gurigiisa iyadoo ay xabado ku yaalaan, welina lama sheegin cida ka danbeysa dilkiisa.

Madaxweynaha Ruushka Vladamir Putin ayaa khudbadiisa sanadaha shalay kusoo qaatay dilalka ka dhacay magaalada Kiev oo uu ku tilmaamay dilal siyaasadeed.

Dhinaca kale qaar kamid ah mas’uuliyiinta dowlada Ukraine ayaa dilalkan ku eedeeyey Ruushka oo ay sheegeen inuu doonayo inuu xiisad ka dhex dhaliyo shacabka dalkaasi Ukraine.

Himilo Media