Madaxeyne Ku-xigeenkii Ciraaq oo lagu dilay Waqooyiga dalkaas

Tikrit, 18 April, 2015 (Himilo)- Madaxweyne Ku-xigeenkii hore ee dalka Ciraaq xilligii uu xukunka hayey Madaxweynihii la deldelay ee Sadaam Xuseen, sidoo kalena Xukumaddaas hoggaamiye Millateri ka ahaa Cisad Ibraahimi Al-Duuri, ayaa lagu dilay dagaal ka dhacay Waqooyiga dalkaas sida ay sheegeen Masuuliyiinta dawladda hadda talada haysa ee Ciraaq.
Cisad Ibraahimi Al-Duuri oo wakhtigan ahaa Hoggaamiyaha Koox taabacsan Ururka Daacish, ayaa lagu dilay gobolka Salaaxu-ddiin oo ku yaalla Waqoyiga magaalada Baqdaad ee Ciraaq; ka dib dagaal dhex-maray Xoogagga uu hoggaaminayay iyo Malleeshiyaad Shiico ah oo taageerta dawladda Ciraaq ka talisa wakhtigan ee Shiicada ah.
Hoggaamiyahan la dilay, ayaa ahaa gacantii Midig ee Madaxweynihii hore ee dalka Ciraaq Marxuumm Sadaam Xuseen oo sannadkii 2003-dii ay xukunka ka tuureen Ciidammo uu Maraykanku hoggaaminayey oo weeraray dalka Ciraaq, iyagoo Sadaam deldelay sannadkii 2006-dii markii uu muddo xidhnaa ka dib.
Al-Duuri, ayaa ahaa Sarkaalkii ugu sarreeyay ee ka tirsanaa Xisbigii dalka Ciraaq hoggaaminayay ee Bacath; isagoo Maraykanku dul-dhigay Madaxiisa lacag fara badan si loo soo qabto, balse lagu guuleysan waayay in la qabto. Cisad Ibraahimi Al-Duuri, ayaa hore loo sheegay in la qabtay, laakiin-se been ayay noqday, balse Taleefishinka Al-Carabiya, ayaa soo bandhigay Jimcihii shalay muuqaallo lagu sheegay Meydka Al-Duuri.
Saraakiisha wadankaas ayaa sheegay in uu ku dhintay dagaal ka dhacay gobalka Salaxuddin, ee waqooyiga Ciraaq. Hase-yeeshee, Taageerayaashiisa ayaa diiday in arrintaasi ay jirto. Al-Douri, ayaa 72-sano jir ahaa, waxaanu Hoggaaminayey Koox la yidhaahdo Naqshbandi oo ah Koox xoog badan oo ka dambeysay kacdoonkii Kooxda Daacish.
Guddoomiyaha gobolka Salaaxu-diin Raa’id Al-Jubuuri, ayaa sheegay in Al-Duuri lagu dilay hawlgal ay fuliyeen Malleeshiyaad Shiico ah oo ka mid ahaa Ciidammadii dhawaan la wareegay magaalada Tikrit, isagoo xusay in lagu dilay Bariga Tikrit.
Ciidammada dawladda Ciraaq oo ay caawinayaan diyaaradaha dagaalka ee Maraykanka iyo reer Galbeedku, ayaa qabsaday dhul ballaadhan oo ay Daacish ka talinaysay, balse kooxda ISIS ayaan weli ka taliya deegaanno badan oo ku yaalla dalka Ciraaq, gaar ahaan gobollada ku yaalla Waqooyiga iyo Galbeedka dalkaas oo ay ku jirto Masuul. Cisad Al-Duuri ayaa la rumeysan yahay inuu gacan ka geystay sidii Ururka Daacish ama ISIS ay u qabsan lahaayeen deegaanno ka tirsan dalka Ciraaq oo ay qaarkood weli ka taliyaan.
Himilomedia.com
Hargeysa-somaliland