“Wada-hadalka Somaliland ay xukuumadda Federalka Somalia kula jirto waxan aaminsanahay xawligii loo baahnaa inaanu ku socon, waxan qabnaa inaan dardar gelino,” Ra’isal Wasare-ku-xigeenka Somalia

Muqdisho:Aug,22,2014(Himilo)-Wasiirka wasaaradda Diinta iyo Awqaafta, ahna ra’isal wasaare-ku-xigeenka Somalia Ridwaa Xirsi Maxamed, ayaa ka Hadlay Wada-hadalkii u dhexeeyey Somaliland iyo Dawladda uu ka tirsan yahay ee Federalka Somalia.

Mudane Ridwaan oo ka Jawaabayey Su’aal laga weydiiyey faraqa u dhexeeya Maamul u samaynta Gobolada Somalia iyo Wada Hadalkii u dhexeeyey labada dhinac ee Somalia iyo Somaliland ayaa sheegay in wada Hadalka labada dawladood uu ka culays iyo miisaan badan yahay Qorshayaashan haatan dawladiisu maamullada ku samanayso,

“Arrinta Somaliland runtii waxan odhan karaa arrin ka culus weeeye hadda dawlad-goboleedyada iyo qaabku sida uu u socdo, waana kala duwan tahay” ayuu yidhi Ridwaan, waxana uu intaas ku daray inuu dareensan yahay in wada Hadalkii gaabis weyni ku yimi,

“Wada hadalka Somaliland ay xukuumadda Federalka Somalia kula jirto waxan aaminsanahay xawligii loo baahnaa inaanu ku socon, waxan qabnaa inaan dardar gelino, hawshaasna inaan u dejin doono qorshe cad oo la doonayo in dadka walaalaha inay ku wada Hadlaan oo ay ku xaqiijiiyaan hadafka iyo danta la leeyahay, waxana aanu qabaa arrintaasi waa Hawl gaar ah.”

Hadalkan kasoo yeedhay wasiirka Dhinaca Diinta u qaabilsa Somalia ayaa muujinaya inay Somalia xiiso gaar ah u qabto wada Hadal ay la gasho Somaliland, iyadoo haatan Dawladda Federalka Somalia laga rabo inay Dalka ka hirgeliso Doorashooyin marka la gaadho Sanadka 2016-ka, taas oo ay doonayso ku talo gal ka yeelato Somaliland.

Himilo Media