Wasiirka Caafimaadka oo ku Guulaystay La-taliye Fu’aad A. Cadde inuu ka soo Lad-qabeeyey Jidkii Xaabsade, Maantana Hargeysa ku soo beegan

Xudun, 24, 2014 (Himilo)- Wasiirka Caafimaadka Somaliland Dr. Saleebaan Ciise Axmed (Xaglo-toosiye), ayaa ku guulaystay inuu soo maslaxo La-taliyaha Madaxweynaha ee arrimaha gobollada Bariga dalka Fu’aad Aadan Cadde oo dhawaanahanba saluug siyaasadeed u joogay Degmada Taleex ee gobolka Xaysimo oo hore uga tirsanaa Sool, waxaanay ku kulmeen deegaankaas oo uu Wasiir Xaglo-toosiye u tegay Dhagax-dhigga Cusbitaal ay Xudun yeelanayso.
Kulan iyo wadahadal dhex-maray Wasiirka iyo la-taliyaha, ayaa la sheegay inuu Xaglo-toosiye ku qanciyey Fu’aad inay isa soo raacaan oo uu ka soo noqdo diidmada siyaasadeed ee uu toddobaadyadii ugu dambeeyey ku joogay deegaankaas, iyadoo hore loo baahiyey inuu u tallaabayo dhinaca Maamul-goboleedka Soomaaliyeed ee Puntland, isaguna uu Waraysiyo badan oo lala yeeshay ka gaabsaday inuu ku caddeeyo su’aalo badan oo lagu weydiiyey waxa uu tabanayo iyo inuu dhinacaas u sii socdo, balse uu markasta ku cudur-daaranayey inaanu wakhtigan wax faahfaahin ah ka bixinaynin, laakiin lagaba yaabo wararka laga qoray ee sheegaya inuu Puntland u galayo inay run noqon karaan, beenna noqon karaan, isla markaana uu caddaynayey inuu ku sugan yahay dhulka Somaliland.
Wasiirka Caafimaad iyo wefti ka kooban hay’adaha kala shaqeeya dhinaca horumarinta adeegyada bulshada ee caafimaadku ka mid yahay oo deegaamo hoos-yimaadda degmada Xuddun ka fulinayey mashaariic horumarineed, ayaa gaadhay tuulada Lafa-weyne oo ka tirsan degmada Xuddun. Tuulada Lafa-weyne Markii ay gaadheen waxa halkaas ku qaabiley oo weftiga Wasiirka Sooryo ugu sameeyey La-taliyaha madaxweynaha ee gobollada Bari Fu’aad Aadan Cadde oo muddooyinkii u dambeeyey ku sugnaa deegaankaas, waxaanay labada masuul halkaas ku yeesheen kulan gaar ah oo ay is-afgarad ku yeesheen, sida ay tibaaxeen ilo-wareedyo Himilo u xaqiijiyey inuu Fu’aad Aadan Cadde ku qancay soo-jeedimo wasiirku u jeediyey.
La-taliye Fu’aad Aadan Cadde waxa uu Wasiirka Caafimaadka Somaliland kala qayb-galay munaasibad xarunta Daryeelka hooyada iyo dhallaanka ah oo laga dhagax-dhigay tuulada Lafa-weyne, waxaana kulankaas dhagax-dhigga ka hadlay Wasiirka Caafimaadka iyo La-taliyaha Madaxweyne ee gobollada Bari.
Sidoo kale, La-taliye Fu’aad Aadan Cadde, ayaa isaguna kulankaas ka hadlay oo sheegay inay wax wanaagsan tahay inay Hay’adihii 23-ka sano ka baqayey gobollada Bari inay maanta ka hawlgalayaan gobolka Xaysimo (Taleex). “Wasiirku aad iyo aad buu u mahadsan yahay, Cusbitaalka Qaaxada ee degmada Xuddun ee uu dhagax-dhigay ee uu ballan-qaaday dhaqso inuu u dhismayo, Xarunta Caafimaad ee aadka loogu baahnaa ee uu hadda (shalay) ka dhagax-dhigay Lafa-weyne, waxa ka sii wanaagsan Hay’adihii 23-ka sannadood odhan jiray Bari waa la isku cunaa oo la tegi maayo kuwoodii ugu muhiimsanaa inay maanta Bari joogaan.” Sidaa ayuu yidhi Fu’aad Aadan Cadde.
Weftiga Wasiir Xagla-toosiye oo shalay gelinkii dambe soo gaadhay magaalada Caynaba ee xarunta gobolka Saraar oo uu weheliyo Fu’aad Aadan Cadde, ayaa xalay ku soo guryo-hoyday magaalada Burco ee xarunta gobolka Togdheer, halkaas oo la filayho inay maalinta Berri ah ka soo amba-baxaan soo gaadhaan magaalada Hargeysa.
Illaa hadda si rasmi ah uma caddayn nooca tabashada siyaasadeed ee uu qabo ama uu tirsanayo Fu’aad Aadan Cadde, waxaanu socdaalka ay maanta isaga iyo Wasiir Xagla-toosiye ku imanayaan Hargeysa meesha ka saaray dareenkii iyo shakigii laga qabay inuu dhinaca Puntland u wareego oo si aad ah loo hadal hayey saddexdii toddobaad ee u dambeeyey. Ka dib markii uu Maamul-goboleedka Puntland ee Soomaaliya uu iska dhiibay Wasiirkii hore ee wasaaradaha Hawlaha Guud iyo Warfaafinta Axmed Cabdi Xaabsade oo ah siyaasi ruug-caddaa ah ay isku-deegaan ka soo jeedaan Fu’aad Aadan Cadde, kaas oo xilliga uu ka goostay Somaliland ahaa La-taliye dhinaca doorashooyinka u qaabilsan Madaxweyne Siilaanyo.
Himilomedia.com
Hargeysa-Somaliland