Djibouti Oo Baadhitaanno Xooggan Ku Bilowday Dadka Dalkeeda ka soo Geliya Dhinaca Somaliland iyo Ciidamo Hor leh Oo Xuduudda ay Keentay

Lawyacaddo:June,04,2014(Himilo)-Waxa si weyn loo adkeeyey Gelitaanka Dalka Djibouti ee dhinaca  Xuduudda Somaliland, iyadoo Halkaas la soo dhoobay ciidamo tiro badan oo si weyn ula socda dhaqdhaqaaqyada dadka doonaya inay Djibouti uga Dudbaan Somaliland.

Sida ay sheegayaan wararka aanu Haynaa waxa dhaqdhaqaaqaasi bilaabmay markii ay soo baxeen warar sheegaya in  shakhsiyaad dhawaan isku qarxiyey Dalka Djibouti ay ka yimaaddeen dhinaca Somaliland, isla-markaana ay xuduudda ka Gudbeen.

Ciidamto tiro badan ayaa lagu arkayaa dhammaan Goobaha Xudduudda ku teedsan, waxana si weyn loo baadhayaan dadka Rakaabka ah ee Dalka Djibouti u Gudbaya.

Dhammaanba Magaalooyinka ku teedsan Xuduudda labada Dal u dhaxaysa ayaa laga wadaa Baadhitaaanka, waxana jira Baadhitaano hoose oo ciidanku ku raadinayo dad ay si gaar ah u daba socdaan.

Dhaqdhaqaaqayada baadhitaanada ayaa si xawli ah u socda, waxana  dadka rakaabka ah laga rogayaa gaadiidka ay saaran yihiin, iyadoo sidoo kale la baadhayo Gaadiidka laftooda.

Baadhtaannadan ayaa lagu wadaa  inay sii socdaan, maadaama ay Djibouti qabto shaki ah in Hargeysa ay ka yimaadeen dadkii qaraxyada maleegay, waxana sidoo ay Somaliland heegan gelisay ciidankeeda Dhinaca xuduudda  jooga, kuwaas oo la socda Dadka labada dal iskaga gudbaya.

 

Himilo Media