Ciidankii Qaranka ee Ku Sugnaa Gudaha Taleex Oo Ka Soo Baxay Iyo Kuwii Deegaanka u dhashay Ee La Qarameeyey Oo Beddelay

Taleex:June,27,2014(Himilo)-Sida ay sheegayaan wararka aanu ka helay Deegaanka Taleex ee Gobolka Sool, Ciidamadii Qaranka ee dhawaan Halkaas gacanta ku dhigay ayaa dib uga soo gurtay Goobihii ay fadhiisimiha ka dhigteen.

Sababta ay ciidamadaasi uga soo baxeen Magaalada ayaa lagu sheegay mid  salka ku haysa Dadka deegaanka oo codsaday in ciidanka dib looga qaado, isla-markaana taas beddelkeeda ay Magaalada Joogi doonaan ciidamadii  dhawaan la qarameeyey eek u soo biiray Somaliland.

Ciidamada la qarameeyey ayaa si buuxda loogu wareejiyey Ammaanka magaalada, waxana ay sugi doonaan ammaanka iyo  kalla dambaynta Gudaha magaalada.

Saraakiisha Ciidanka qaranka iyo Xukuumadda Somaliland wali kamay hadal soo guuritaanka Ciidanka, hase yeeshee waxay u muuqataa in Qorshe cad Xukuumaddu kaga soo guurtay maadaama ay ka eriday Kooxdii Khaatumo ee shirka wadatay.

Xaaladda Guud ee deegaankaas ayaa haatan si buuxda u deggen, waxana ciidanka qaranka Xooggoodu joogaa Goobo aan sidaas uga fogayn Goobihii ay hore u joogi jireen, xaaladda Magaaladuna waa mid sugan oo Somaliland si Buuxda Taladeedu uga fulayso.

 

Himilo Media