Miyuusikadii Hordhaca Wararka Idaacadda iyo Telefishanka Qaranka oo Ku biiray Hantida Somaliland kaga Maqan Soomaaliya

Hargeysa, 13 Jan, 2014 (Himilo)- Miyuusikada Astaanta u ahayd Wararka Idaacadda Radio Hargeysa iyo telefishanka Qaranka, ayaa shalay si rasmi ah loo beddelay, kaddib markii ay isku mid noqdeen Astaanka Wararka ka baxa warbaahinta dawladda Somaliland iyo kuwa dawladda Soomaaliya.
Miyuusikadan oo Idaacadda iyo Telefishanka Qaranka laga saaro xilliyada ay soo-galayaan wararka oo uu astaan u yahay, ayaa laga soo dheegay hees waddani ah oo Nus Qarni ka hor uu sameeyey Abwaan Ismaaciil Cali (Basbaas) oo xilligan ka tirsan Fannaaniinta Somaliland, waxaana isticmaalkiisa ku soo biiray Idaacadda Muqdisho iyo telefishanka Soomaaliya oo afartii sanno ee u dambeeyey Astaanta wararkooda u isticmaalayey miyuusikada, iyada oo Astaanta lagu beddelay laga soo dheegay hees ay sameeyeen fannaaniintii la odhan jiray Walaalaha Hargeysa ka hor midowgii fashilmay ee dhexmaray Somaliland iyo Soomaaliya sannadkii 1960-kii.
Wasiirka Wasaaradda Warfaafinta iyo Wacyi-gelinta Somaliland Cabdilaahi Maxamed Daahir Cukuse oo shalay shir-jaraa’id ku shaaciyey go’aanka lagu beddelay Miyuusikada Astaanta u ah Radio Hargeysa, waxa uu sheegay in Miyuusikada hor-dhaca u ah Wararka ka baxa Idaacadda iyo telefishanku uu ka mid yahay Astaamaha Qaran leeyahay, idaacadaha Hargeysa iyo Muqdisho-na aanay isku Astaan noqon karin, sidaas awgeedna ay go’aansadeen inay Astaantan isticmaalkeeda uga guuraan warbaahinta dawladda Soomaaliya, kana mid noqoto Hantida Somaliland kaga maqan dalkaas.
Wasiirka oo arrintan ka hadlayey, waxa uu yidhi, “Waxaanu ku dhawaaqaynaa inaanu beddelnay Miyuusikada Astaantii Warka ee Idaacadda Jamhuuriyadda Somaliland oo ka mid ahaa hantida shacabka Jamhuuriyadda Somaliland ee ku maqan ama ku luntay Midowgii Soomaaliya; miyuusikada ay maanta isticmaasho Idaacadda Muqdisho waa heesta uu sameeyey Basbaas oo ah muwaadin reer Somaliland ah maanta ka mid ah Fannaaniinta Qaranka.”
“Astaantaas Miyuusikada warka oo ilaa immika aynu inaguna isticmaalaynay, waxaynu uga guurnay markii ay suurta-gal noqon waynay inay iyagu inooga tagnaan. Maanta waxaynu u aqoonsannay inay Astaantaasi ka mid tahay Hantida innagaga maqan midowgii Soomaaliya ee maalin uun taariikhda laga xisaabtami doono,” ayuu yidhi Md Cukuse.
Wasiirka Warfaafintu waxa uu sheegay in go’aankani ka mid yahay tallaabooyinka lagu fulinayo dhismaha Qaranimada iyo madax-bannaanida Somaliland, waxaanu yidhi, “Astaanta Idaacadda Qaranku waxay ka mid ah Astaamaha ay dawladi leedahay ama waddan leeyahay, sidaa awgeed, waxa lama huraan noqotay in Idaacadda Hargeysa iyo Idaacadda Muqdisho ay laba astaamood oo kala duwan yeeshaan oo aynu toos u fulino go’aankeena dhismaha qaranimada Jamhuuriyadda Somaliland.”
Himilomedia.com
Hargeysa-Somaliland