Daacish Oo Madaxa Laba Nin Oo Reer Jabaan ah Duldhigtay $200-million, Beddelkoodana Dil Ku Hanjabtay

Mousil:Jan,20,2015(Himilo)-Islaamiyiinta Daacish ee dalalka Syria iyo Ciraaq, ayaa soo bandhigay laba muwaadin oo u dhalatay dalka Japan, kuwaas oo ay sheegeen inay lacag madax furasho ah ku doonayaan.

Labada muwaadin ee u dhalatay Japan ayaa kooxda Haystaa ay sheegeen inay muddo 72-saacadood ah haddii aan la dhigin lacag dhan $200 ay qoorta ka jari doonaan, waxana ay xidhnaayeen dharka lagu yaqaan dadka ay dilayaan, iyadoo labada muwaadin midkood uu ahaa wariye caan ka ahaa dalka Japan oo dhawaan kooxdaas gacanteeda galay.

Ninka IS u qaabilsan fulinta dilalka gowraca ayaa ka soo muuqday muuqaalka, kaasoo hore u gowracay afar muwaadin u dhalatay dalalka Mareykanka iyo Britain.

Labada Muwaadin ayaa lagu kala magacaabaa Kenji Goto Jogo oo ah wariye caan ah, kaasoo bishii October lagu afduubtay magaalada Kobane, sidoo kale ninka kale ayaa lagu magacaabaa Haruna Yukawa, kaasoo ah khabiir milateri oo u shaqeynayay shirkad howlaha milateriga qaabilsan.

Muuqaalkan ay sii deysay IS ayaa ku soo aaday, iyadoo Ra’iisul Wasaaraha Japan Shinzo Abe uu booqanayo Bariga Dhexe, isagoo u balan qaaday 200-milyan oo dalalka dagaalka kula jira IS.

Ra’iisul Wasaaraha Japan oo ku sugan magaalada Qudus ayaa ku tilmaamay arrintan mid aan la aqbali karin, isagoo xusay inay taageerayaan dalalka bariga dhexe.

Japan ayaa waxaa hore uga jiray walaac ah sida dowladdu xooga u saartay siyaasada arrimaha dibada, waxaana su’aalo badan la iska weydiinayaa sida ay IS ka yeelayaan labada muwaadin ee ay afduubka u heystaan, iyadoo tani ay tahay mid caqabad ku ah fara gelinteeda dibada.

 

Himilo Media