Hargeysa Oo Saaka Laga Hirgeliyey Isbeddel Cusub Oo Xagga Waddo Marista ah Iyo Saxmaddii oo Yaraatay

Hargeysa:Jan,14,2015(Himilo)-Magaalada Hargeysa ee Caasimadda Hargeysa, ayaa saaka wax aka dhaqan galay wareegto dhawaan Wasiir Warancadde soo saaray oo wax lagaga beddelayey Jihooyinka qaar kamid ah waddooyinka dalka loo marayo.

Waddooyinka waaweyn ee Magaalada badhtankeeda mara qaar kamid ah ayaa saaka aan loo ogolayn in sidii hore oo kale Gaadiidku u isticmaalo, waxana muhiimad gaar ah la siiyey Gaadiidka Hormara Waddada Madaxtooyada oo ay isticmaalayeen Gaadiidka u socda Jihada Galbeedku.

Sidoo kale waddada Dhinaa Waqooyi ka marta Cisbitaalka Weyn ee Magaalada Hargeysa, ayaa waxa isticmaalayey oo loo ogolaa kaliya Gaadiidka u socda Jihada Bari ee Magaalada, waxana ay taasi si weyn saamayn ugu yeelatay cidhiidhi badan oo magaalada Laga dareemi jirey.

Nidaamka cusub ee loo sameeyey waddo marista Magaalada Hargeysa, ayaa si weyn loo dareemay, waxana si ka duwan sidii hore ay gaadiidku u gaadhayeen Goobaha ay u socdaaa, waxana haatan ka hor inta Badan gaadiidka magaalada Dhex maraa isticmaali jireen Waddada Wadnaha ee hormarta Madaxtooyada, taas oo dhibaato ku ahayd dadka iyo Gaadiiskaba.

Wasiir Warancadde oo isagu hore nidaamkan cusub ugu dhawaaqay, ayaa waxa uu kormeer joogto ah ku hayey hannaanka uu hirgalay   nidaamkan cusubi, waxana uu la shaqayayey Ciidanka Nabadgelyada waddooyinka oo si hugan saaka shaqadooda u qabanayey.

Taliska ciidanka Nabadgelyada waddooyinka, ayaa isagu gaaf wareegayey dhammaanba waddooyinka isbeddelka lagu sameeyey, waxana culayska la saaray Laba waddo oo kala ah Waddada Madaxtooyada Hormarta iyo midda dhakhtarka ka marta dhanka waqooyiga, waxana labadaas waddo marka loo socdo Jihada bari ay iskugu imanayaan Kaalinta ina Gallan ee xaafadda New Hargeysa, Halka Marka Jihada Galbeed la aadana ay iskugu imanayaan Huteel Guled ee Galbeedka Magaalada Hargeysa.

 

 

 

Himilo Media