“Shantan innagu wareegsan ee Xayraanka ahi meesha (Somalia) way u shaqo tagaan, xumaan inaanay ka sheegayna waa la ogaa”

Hargeysa, 14 Jan, 2015 (Himilo)- Guddoomiyaha Guddida Arrimaha Bulshada ee Golaha Guurtida Somaliland Xildhibaan Cabdiqaadir Indho Indho, ayaa naqdiyey go’aamadii ka soo baxay shir Wasiirrada Arrimaha Dibadda ee Urur-goboleedka IGAD dhawaan ugu qabsoomay Magaalada Muqdisho, waxaanu qodobbada ku jiray war-murtiyeed gunaanadkii shirkaas laga saaray oo qaarkood Somaliland lagaga hadlay ku tilmaamay inaanay wax dhibaato u keeni kara Somaliland.
Mudane Indho-Indho waxa uu sheegay in caqliga saliimka ahi si fiican u garan karo inaanay dalalka Xubnaha ka ah Urur-goboleedka IGAD dhex ka noqon Karin arrimaha Somaliland iyo Somalia dhexdooda yaalla, isaga oo taas ku sababeeyey in waddamadaasi dano-siyaasadeed ka leeyihiin dalkaas isla markaana ay ilaashanayaan maslaxaddooda.
“IGAD inaanay Somalia iyo Somaliland dhex u noqonayn Ilmaha yare e Carruurta ah baa garanaya, waayo Nimanka Igad Ciidamadoodii waxay joogaan Meesha Baaba’day ee Somalia la Yidhaahdo, dee Nimankaas xamar u shaqo tegay inay Somaliland oo aanay u shaqo tegin u xaqsooraan anigu marnaba ma filaynin, adduunkana lacag bay kaga gurtaan Shantan nin(IGAD) inagu wareegsan ee Xayraanka ah ee Igad la baxay meesha way u shaqo tagaan xumaan inaanay ka sheegaynna waa la ogaa,” sidaas ayuu yidhi Xildhibaan Cabdiqaadir Indho indho oo shalay warbaahinta kula hadlay Hargeysa.
Xildhibaanka oo Hadalkiisa sii watay waxa uu yidhi, “IGAD adduunyadu xisaab xidh bay ka rabtaa oo lacagtan ciidamadooda la siiyo adduunkaa bixiya, markaa caddaalad iyo aqoonsi midna kama filayo, haddii ay Somalia Nabadi ka dhacdana meel ay shaqayn doonaan garan maayo.”
Dhinaca kale Xildhibaan indho indho waxa uu ka Hadlay Wada-hadallada Somalia iyo Somaliland u dhexeeya, waxana uu sheegay in laga leexiyey waddadii caalamku u jeexay inay wada-hadalladu raacaan, isagoo carrabka ku adkeeyey in lagu dhiirrado arrimaha Masiiriga ah ee muhiimka ah. Xildhibaanku waxa uu ku taliyey in gebi-ahaantooda layska dhaafo wada-hadallada Soomaaliya haddii aan loo hoggaansamayn shuruudaha masiiriga ah ee miiska saaran.
“Anigu waxan soo jeedin lahaa inaynu Gebigoodaba iska dayno wada-hadalladooda ama sidii adduunku yidhi u wada Hadla aynu wada Hadalno ilayn sidan aynu haatan u wada Hadlaynaa sidii la yidhi u wada Hadla ma ahee.”
Himilomedia.com
Hargeysa-Somaliland