Ciidamada Ciraaq, Maraykanka iyo Malleeshiyooyin Shiico ah oo go’doomiyey Magaaladii Saddaam ku dhashay oo Daacish haysato

Tikrit, 24 March, 2015 (Himilo)- Ciidamada dawladda Ciraaq oo taaageero ka helaya Maraykanka iyo Malleeshiyooyin dawladda taabacsan oo Shiico ah, ayaa isku gedaamay magaalada Tikrit ee dalkaas oo ay gacanta ku hayaan xooggaga Daacish, sida uu Warbaahinta u sheegay Wasiirka Gaashaandhigga Ciraaq.
Millateriga Ciraaq oo ay taageerayaan 20,000 oo malleesiyaad Shiico ah, ayaa isku dayaya inay dib ula wareegaan magaalada Tikrit oo ah magaaladii uu ku dhashay, isla markaana lagu aasay Madaxweynihii hore ee Ciraaq Sadaam Xuseen, sidoo kalena ah magaalooyinka waaweyn ee taariikhiga ah ee ay deggen yihiin Sunniyiinta laga tirada badan yahay ee Waddankaas.
Wasiirka Gaashaandhigga Ciraaq Khaled Al-Cubeydi, ayaa sheegay in hawl-galka ay ku doonayaan inay dib ugu qabsadaan Tikrit uu soo socday muddo hal toddobaad ah, isagoo xusay inay isku dayayaan inay yareeyaan khasaare soo gaadha dadka shacabka ah ee magaaladaas ku dhaqan.
“Marka aannu u aragno inay tahay suuro-gal ayaannu gudaha u geli doonnaa magaalada. Haatan Tikrit si buuxda ayaan ugu hareeraysannahay… waxaanan isku dayi doonnaa inaanay shacabka soo gaadhin wax khasaare ah oo dagaalka ka dhasha.” Sidaa ayuu yidhi Wasiirka Gaashaandhigga Ciraaq Khaled Al-Cubaydi oo Shalay Saxaafadda la hadlay.
Sidoo kale, Wasiirku wuxuu sheegay in xoogagga ISIS ama Daacish ay gudaha magaalada ku jiraan, isla markaana ay yihiin kuwo niyad-jabsan. Isagoo intaas ku daray markii ay u habboonaato in ay geli doonaan gudaha magaaladaas, wax iska cabin ahna aanay baqdin ka qabin wakhtigan oo kaga yimaadda dhinaca Kooxda Daacish.
Hawlgalkan lagu go’doomiyay magaalada Tikrit, ayaa noqonaya hawlgalkii ugu weynaa ee ay Mareykanku ka qaybqaadanayaan ee dhinaca dhulka ah ee ka dhan ah kooxda Daacish, inkasta oo Saraakiil ka tirsan Wasaaradda Gaashaandhigga Mareykanku ay ka gaabsadeen inay ka hadlaan ka qaybgalka hawlgalkan.
Si kastaba ha, ahaatee, haddii Ciidanka dalka Ciraaq ay ku guuleystaan inay ISIS ka saaraan magaalada Tikrit waxay u noqonaysaa guul weyn oo ay gaadheen, hase-ahaatee, haddii ay ku guul-darreystaan waxay taasi fashilinaysaa hawlgallada ay ka wadaan dalkaas ee Maraykanka iyo Xulufadiisu taageerayaan ee ka dhanka ah Islaamiyiinta Daacish ee ka dagaallama inta badan Waqooyiga Ciraaq, dalka Suuriya iyo meelo kale oo ay Jabhado ka joogaan-ba.
Himilomedia.com
Hargeysa-somaliland