Golaha Wakiillada Somaliland iyo Hay’ad Caalami oo ka dooday Halista Hubka Fudud ee Sharci-darrada ah

Hargeysa, 25 March, 2015 (Himilo)- Guddoomiye ku-xigeenka 2aad ee Golaha Wakiillada Somaliland Md Cali Maxamed Yuusuf, ayaa faahfaahin ka bixiyey ujeeddada kulan ay shalay la yeeshay Sarkaal ka tirsan hay’ad Caalami ah oo ku shaqo leh la-dagaalanka iyo ka-hortagga dhibaatooyinka Hubka Fudud ku hayo dunida iyo sidii loo diiwaangelin lahaa, kaas oo shalay khudbad dhinacyo kala duwan u jeediyey mudaneyaasha Golaha Wakiillada Somaliland.
Md Cali Yuusuf waxa uu sheegay in kasta oo Somaliland Xeerar lagu xakameeyo hubka fudud leedahay, haddana kulanka shalay lagaga hadlay isla markaana mudaneyaashu si qoto-dheer u falan-qeeyeen sida ugu habboon ee lagu xakamayn karo dhibaatada uu leeyahay hubka fudud ee sharci-darrada ah ee dadka shacabka ahi iska haystaan.
Md Cali Yuusuf oo markii kulankaasi dhammaaday war-fidiyeennada kula hadlay xafiiskiisa, ayaa yidhi, “Waxa maanta (shalay) noo yimi xildhibaan ka socda Dowladda Sweden, xoghaye Guudna ka ah Hubka hay’adda yar-yar ee adduunka. Golaha Wakiillada, ayuu u soo jeediyey Khudbad, xildhibaannaduna su’aalo ayay ka weydiiyeen.
Innagu Xeer baynu ka samaysannay sidii loo diiwaangelin lahaa hubka yar-yar iyo wixii laga yeeli lahaa, markaa arrintaas ayuu kulanka goluhu ku saabsanaa.”
Guddoomiyaha oo hadalkiisa sii watay, waxa uu intaas ku daray, “Nuxurku wuxuu ahaa dhibaatada uu leeyahay Hubka Fud-fudud ee uu dunida ku hayo oo waddamada qaarkood tirakoob laga sameeyey. Innagu waddan dagaal soo maray baynu nahay oo hubku si xad-dhaaf ah uu ugu fiday dalka, arrintaas wixii laga yeeli lahaa, ayay xildhibaannadu fikrado ka soo jeediyeen,” Sidaas ayuu yidhi Guddoomiye Cali Yuusuf.

Himilomedia.com
Hargeysa-somaliland