Maalmo Nadaafadeed Oo Xukuumaddu Iclaamisay iyo Awaamiir La Faray Maayarrada Waddanka

Hargeysa:Mar,29,2015(Himilo)-Xukuumadda Somaliland, ayaa Maanta Iclaamisay Maalin gaar ah oo Dalka oo dhan laga hirgelin doono Arrimo Nadaafadeed, waxana Hoggaanka Dawladaha Hoose ee Dalka la faray inay Arrinta Nadaafadda ku baraarugaan.

Masuuliyiin uu Hoggaaminayo Wasiirak Arrimaha Gudaha Somaliland, Xubno-na ay ka yihiin Wasiirka Deegaanka, Ku-xigeenka   iyo Xubno kale oo Badhasaabo iyo Goleyaal Deegaan iskugu jira oo maanta saxaafadda la Hadlay, ayaa si rasmi ah u shaaciyey in 7-da bisha soo socota dalka laga hir galin doono olole nadaafadeed oo qashinka lagaga ururin doono.

Wasiir Warancadde,ayaa badhasaabada iyo Maamulada Magaalooyinka faray inay maalintaasi si hagar la’aan ah u nadiifiyaan Magaalooyinka islamarkaana Bulshadu ka qayb qaadato.

“waxa loo baahan yahay in Ay nadaafada ka shaqayno dhamaan miyi iyo magaalaba,waxaanu Garanay oo ay dawladuna Garatay in Bisha Todobadeed inaanu Olole Nadaafada Ah ka bilawno Gobol walba,Halkan waxaan Amar uga Jeedinayaa Dhamaan Gobolada Somaliland Badhasaabada iyo maamulkooda in Ay Maalintaas loo Asteeyay u Diyaar Garoobaan in Gobol Walba iyo Degmo waliba isku tashato oo ay samayso olole nadaafadeed”ayuu yidhi Warancadde.

Wasiir Warancadde, waxa uu ku guubaabiyay bulshada inay maalintaasi u soo baxaan nadiifinta magaalooyinka ay ku nool yihiin isagoo ku dooday inay arrintani Citiraaf horseedayso “Hawl Galkaas nadaafadeed waxa uu noqon Doonaa mid aan la iskaga hadhin ee la isku abaal mariyo,waxaana uu noqon doonaa mid la iskaga abaal gudo oo tartan ka dhexeeyo bulshada, Sidaas awgeed Bisha Todobadeeda waxa inoo balan ah iyada oo dawladuna ka qayb gali Doonta in dadka ku nooli isku soo bax sameeyaan,hadii aynu iska nadiifino qashinka waxa la odhan doonaa kuwani waa kuwaas isku tashadee Hala aqoon sado”, ayuu wasiirku yidhi.

Marwo Shukri Xaaji Baandare,Wasiirka degaanka ayaa rajo fiican ka muujisay in 7-da bisha dalku noqon doono mid ka nadiif ah qashinka “Anagu ka wasaarada ahaan maalinta ay tahay toddobada bisha waxaanu rajo wayn ka qabnaa in Dalku koone ilaa koone Safaysan yahay maaha qawda maqashii waxna ha u qabane,iska soo bax oo meesha war-wareegna maaha,waxaana weeyaan in Maalintaas qaran qofkasta dhankiisa wax ka qabto,Sida uu qof kasta guriisa u nadiifiyo ayaa loo baahan yahay in Maalintaas loo nadiifiyo,waxaana loo baahan yahay in Ay wasaarad Waliba waxeeda la kaaladay Maalintaas laakiin looma baahna in Faro Madhnaan Ay madasha ku yimadaan”, ayay Marwo Shukri tidhi

Wasiir xigeenka Warfaafinta, Marwo Shukri Xariir Ismaaciil, ayaa iyana madasha ka hadashay “Saxaafadda waxaan leeyahay hadii wasiir kasta inta uu yimaado isaga oo hogaaminaya wasaaradiisa inta uu yara taabtaabto qashinka iskaga dhaqaaqo waad sheegaysaan,maalintaas wasiir iyo shacab danta qaranka iyo nadiifinta dalka waa loowada siman yahay,Anagu hadaanu nahay warfaafintii waanu soo guran Kamaradihii ee wasaaradaha kale waxaan leeyahay hasoo ilaabina faralaydii iyo Majarafadii”.

Xukumadda Siilaanyo, ayaa bilawgii muddo xileedkeeda la kawsatay maalmo u gaar ah Qashin Ururinta balse muddo kooban shaqeeyay, iyadoo haddana ay muuqato in wakhti xilkii ka dhamaaday ay dib ugu hambabartay Ururinta Qashinka oo Goleyaasha degaanku u xilsaaran yahay.

 

Himilo Media