Madaxtooyada oo war ka soo saartay Kulan dhexmaray Weftiga Madaxweyne ku-xigeenka iyo Jaaliyadda Reer Washington

Washington, 29 March, 2015 (Himilo)- Madaxweyne ku xigeenka Somaliland Md Cabdiraxmaan Cabdilaahi Ismaaciil (Saylici) oo isaga iyo Wefti uu hoggaaminayaa socdaal ku joogaan dalka Maraykanka, ayaa kulan la qaatay Jaaliyadda Somaliland ee ku dhaqan magaalada Washington ee Xarunta dalkaas.

[gallery ids="17693,17692"]

Kulanka oo Casho-sharaf Jaaliyaddu ku maamuustay, waxa Madaxweyne ku-xigeenka ku wehelinayey wasiiru-dawlaha wasaaradda Waxbarashada Md Axmed Nuur Faahiye iyo Taliyaha Gaarka ah Md Saylici, sida lagu sheegay wa-saxaafadeed kooban oo madaxtooyadu ka soo saartay kulankaas, kaas oo u dhignaa sidan:- “Kulankan oo ahaa mid soo dhawayn iyo is xog waraysi ay ku kala qaateen madaxweyne ku xigeenka iyo jaaliyadu ayaa ahaa mid ku bilowday jawi farxadeed oo ay jaaliyadu xog muhiima oo la xidhiidha xaalada dalka uu halkaasi ku siiyey madaxweyne ku xigeenku bulshadii halkaasi isugu timid.
Waxaanu madaxweyne ku xigeenku ugu horaynba faahfaahin dheer ka bixiyey ujeeddada safarkiisa iyo xaalada dalku marayo wakhtigan iyo ta geeska Afrikaba, waxaanu madaxweyne ku xigeenku kula dardaarmay jaaliyada reer Washington inay xoogga saaraan sidii ay dalka wax ugu soo kordhin lahaayeen ugana shaqayn lahaayeen sida muwaadiniin badaniba ay dedaal ugu jiraan in dalku uu noqdo mid ka tirsan dawladaha caalamka ee la aqoonsan yahay xil gaar ahna ay iska saaraan, kana war hayaan hawlaha dalka ka socda ee dib u dhiska waddooyinka iyo dalkaba oo uu madaxweyne ku xigeenku sheegay in lagu kala dheereeyey reer Washington-na looga fadhiyo sidii ay dhinacooda uga tiirin lahaayeen dedaalkaa.
Waxa kale oo isna halkaasi ka hadlay wasiiru-dawlaha waxbarashada oo jaaliyadda u soo jeediyey in ay noqdaan kuwo meel ay joogaanba dalka u jooga oo ku dedaala inay kaalin muuqata ka qaataan.
Ugu danbayna waxa halkaasi ka hadlay safiirka Somaliland u fadhiya dalka Maraykanka Amb. Rashiid Gaaruf oo mahadnaq ballaadhan halkaasi uga soo jeediyey jaaliyadda ku dhaqan Washington sida sharafta iyo milkaha leh ee ay uga soo wada qaybqaateen isuguna xilqaameen inay madaxweyne ku xigeenka soo dhaweeyaan una sameeyan kulankan casho sharafta ah ee qiimaha gaarka ah leh madaama ay noqotay jaaliyadii u horaysay ee madaxweyne ku xigeenka qaabisha una casho samaysa,” Sidaas ayaa lagu sheegay war-saxaafadeedka madaxtooyada.
Himilomedia.com
Hargeysa-somaliland