Balli Ku Yaalla Deegaanka Biyo-shiinaha Oo ay Ku Geeriyoodeen Saddex Carruur ah Oo Laba Kamid ahi Walaalo ahaayeen

Hargeysa:Oct,05,2014(Himilo)-Wararka laga Helayo deegaanka Biyo-shiinaha oo ku yaalla Waqooyiga Caasimadda Hargeysa, ayaa waxa ay sheegayaan in Balli halkaas ku yaallaa uu shalay liqay saddex carruur ah oo ku dabaalanayey.

Caruurtan Gerriyootay oo ahaa sadex hablood oo laba kamid ahi walaalo yihiin da’ dooduna udhexeyso 13 Ilaa 15-Jir, ayaa la sheegayaa inay isku dayayeen inay Balligaas ku dabbaashaan, waxana sida aanu warka ku Hayno ay ubadkaasi Balliga galeen xilli aabahood oo waday uu salaaddii duhur ee shalay tukashadeeda u amba baxay.

Wararku waxay sheegayaan in aabaha ubadkaas dhalay uu arkay iyagoo isku shubay balligaas oo ceel-biyood lahaa, isla-markaana uu si degdeg ah uga soo daadgureeyey kuwii yaryaraa, balse nasiibdarro uu markiiba liqay saddex kamid ahaa oo ugu waaweynaa.

Xarunta Dambi-baadhista ee CID-da, ayaa xalay la geeyey ubadka meydkooda, waxase markii dambe la sheegay in sababta la ogaaday, isla-markaana la go’aamiyey in la aaso.

Shilalka noocan oo kale ah ayaa maalmaha ciidaha dhaca, waxana walidiinta ubadka goobaha kala duwan u dalxiis geeyaa ay la kulmaan dhibaatooyin badan oo inta badan u badan dhinaca shilalka gaadiidka.

Himilo Media