30-Ka Mid ahaa Ciidanka Ammaanka Masar Oo Qarax Lagu Laayey

Sinai:Oct,25,2014(Himilo)-Ilaaa iyo haatan inta la xaqiijiyey 30-askari oo kamid ahaa ciidamada ammaanka dalka Masar, ayaa lagu laayey qarax weyn oo lagu qaaday Gobolka Sinai ee Bariga dalkaasi.

Qaraxan ayaa lala eegtay Xarun ciidanku ku lahaayeen halkaas maalintii jimcaha ahayd, waxana intaas kadib weerar kale oo rasaas loo adeegsaday lagu qaaday Bar kantarool oo wax lagu baadhi jirey.

Weerarkan ayaa keenay in dowlada Masar ay xaalad deg deg ah kusoo rogtay gobalka Siinaay. Madaxweynaha Masar Cabdifatax Al Sisi ayaa sheegay in weerarada argagaxisada ee ka socda Siinaay lagu doonayo in lagu burburiyo dalka Masar.

Sisi ayaa maanta oo Sabti ah la kulmay Taliyayaasha ciidamada wuxuuna sidoo kale xidhay xaduudii Rafax ee u dhaxeysay Gaza iyo wadanka Masar.

Masar ayaa qalalaase ku jirtey tan iyo intii xilka laga qaaday Madaxweynihii hore ee dalkaasi Maxamed Mursi, waxana dagaal adag haatan xukuumaddan kula jira Kooxo islaamiyiin ah oo weeraro gaadmo ah ka wado goobo kala duwan.

 

Himilo Media