Ingiriiska oo la Saxeexday waddamo Somaliland ku jirto heshiis Dhiirrigelinaya Maalgashi Caalami ah iyo waxa uu ku saabsan yahay

Baarlamaanka UK oo Heshiiskan wax ka weydiiyey Xoghayaha Arrimaha Gudaha ee Ingiriiska

London, 28 Oct, 2014 (Himilo)- Dawladda Ingiriiska, ayaa shaaca ka qaadday in dalal ay Somaliland ka mid tahay la gashay Heshiis dhigaya in Muwaaddiniintooda Sharci-darrada ku gala waddanka Britain dib loogu celin karo dalalkooda ay ka yimaaddeen ee Somaliland ku jirto.
Heshiiskan, ayaa u muuqda mid muujinaya heerka kala duwanaanshaha nabadgelyada iyo isku hallaynta xasilloonida ka jirta Somaliland ee aan ka jirin Soomaaliya oo sidoo kale aan qayb ka ahayn dalalka ay Ingiriisku sheegeen inay kula jiraan heshiiskan oo ay ka mid yihiin waddamo badan oo caalamka ka tirsani.
Wasiiru-dawlaha arrimaha gudaha Ingiriiska, ayaa sheegay inay jiraan waddamo badan oo aqbalay heshiis tafaasiishiisa lagu weydiiyey Baarlamaanka oo ay ku jirto Somaliland. Xildhibaan Frank Field oo ka tirsan Xisbiga Shaqaalaha oo fadhi Baarlamaanka Britain yeeshay Axaddii su’aal ku weydiiyey Xukuumadda ayaa u dhignayd sidan. “Ma noo sheegi karaa Wasiiru-dawlaha arrimaha gudahu waddamadda Xukuumadda Ingiriisku la saxeexatay heshiis aqbalaya in lagu celiyo Muwaaddiniintooda sharci-darro ku soo gala dalkeenna.?”
Wasiiru-dawlaha Arrimaha Gudaha Ingiriiska James Brokenshire oo su’aashaas ka jawaabay, ayaa sheegay in Ingiriisku heshiis aqbalaadeedka Midowga Yurub kula jiro waddamo ay ka mid yihiin Albania, Bosnia-Herzegovina, Macedonia, Georgia, Hong Kong, Macau, Moldova, Montenegro, Pakistan, Russia, Serbia, Sri Lanka, Turkey iyo Ukraine.
Mr. Brokenshire, ayaa intaas ku daray in dalkiisu heshiis isfaham ku saabsan ku soo celinta Muwaaddiniintooda sharci-darrada ku jooga Ingiriiska uu la wadaago waddamada Afghanistan, Angola, Burundi, China, Democratic Republic of Congo, Guinea, Iraq, Kuwait, Malaysia, Nigeria, Rwanda, Sierra Leone, Somaliland, South Sudan iyo Vietnam.
Heshiiskan Xukuumadda Ingiriisku sheegtay inay la wadaagto waddamo Somaliland ku jirto, isla markaana ka maqan tahay Soomaaliya, ayaa muujinaya mowqifka kala duwanaashahooda ay qabto, iyo ku kalsoonaanta xasiloonida buuxda ee waddamada caalamka ka jirta sida Somaliland.
Heshiiskan oo xukuumada Somaliland weli tafaasiil dheeraad ka ka bixin lana mid ah kuwo noociisa ah oo hore waddamo ay Itoobiya ka mid tahay la gashay, ayaa noqon kara mid soo jiita maalgashedayaasha caalamku inay ku soo dhiiradaan xasiloonida uu muujinayo awgeed, isla markaana noqonaya dood adag oo xukuumadda iyo shacabka Somaliland ku difaacaan madaxbanaanida dalkooda.
Himilomedia.com
Hargeysa-Somaliland