Diyaradaha Dagaalka Kenya Oo Duqaymo Ka Geystay Goobo Lagu Tuhunsan Yahay Kooxaha Al-shabaab

Jilib:Oct,02,2014(Himilo)-Deegaanka Jilib ee Gobolka Shabeelaha Dhexe ee Somalia, ayaa la sheegayaa inay shalay duqaymo ka fuliyeen diyaarado dagaal oo loo malaynayo inay Kenya Leedahay.

Sida ay sheegayaan warar lagu kalsoon yahay, waxa duqeynta diyaaradaha Kenya ay sababtay qasaare baaxad leh oo soo gaadhay dagaalyahanada Al-Shabaab iyo dad rayid ah, inkasta oo aan la soo sheegin qasaaraha rasmiga ah ee ka dhashay duqeynta.

Qaar ka mid ah dadka ku nool degmada Jilib ayaa warbaahinta u sheegay in diyaaradaha dagaalka ee Kenya ay shalay gantaal ku dhufteen saldhigi booliiska ee degmadaasi oo fadhiisin u ahaa maleeshiyaadka Shabaab.

Dagaalyahanada Shabaab ayaa la sheegay inay xidheen waddooyinka soo gala saldhiga, si an loo arkin qasaaraha ka soo gaadhay duqeyntaasi, ilaa iyo hadda si dhab ah looma oga waxyeellada ka dhalatay duqeeyntaasi.

Sidoo kale diyaaradaha ayaa lagu soo waramayaa iney isla shalay duqeeyeen saldhig kale oo kooxda Shabaab ku laheyd duleedka magaalada Jilib, waxana dadka ku nool jilib ay sheegeen iney arkayeen qiiq iyo uuro madow oo hawada isku shareeray.

 

Al-Shabaab ayaa xilligan waxaa soo wajahay culayskii ugu darnaa, kadib markii uu bilowday howlgalka Badweynta Hindiya oo loogala wareegay inta badan magaalooyinkii ay gacanta ku hayeen.

 

 

 

Himilo Media