Maxkamad 30-Sano Oo Xadhig ah ku Xukuntay Nin Somali ah Oo Dhalashada Maraykanka Haysta

Portland:Oct,02,2014(Himilo)-Maxamed Cismaan Maxamuud oo ah Muwaadin somaliyeed oo Haysta dhalashada waddanka Maraykanka ayaa waxa 30-sano oo xadhig ah ku ridday Maxkamad ku Taalla Gobolka Oregon ee Dalka Maraykanka.

Maxamed Cismaan Maxamuud, ayaa waxaa lagu helay eedeymo ah inuu damcay in sanadkii 2010-kii uu qarax ka geysto goob ay isugu soo baxeen dad u dabaal degaayay munaasabada ciidda masiixiga, gudaha Magaalada Portland.

Xeer Ilaalinta Magaalada Portland, ayaa waxay dalbatay in ninkan lagu xukumo xabsi dhan 40 sano, balse Garsooraha Maxkamada oo lagu magacaabo Garr M. King, ayaa ugu cudurdaaray dhalinyaranimada ninkaasi, iyadoona uu 30 sano kaga dhigay.

Garsooraha Maxkamada, ayaa qaba in xukunkan uu digniin adag u noqon doono nin kasta, oo doonaaya in uu dhibaato u geysto muwaadiniinta Mareykanka ah, ee aan waxba galabsan.

Maxamed Cismaan oo 23 sano jir ah, ayaa qirtay in uu maleegaayay in uu dhibaato u geysto isku soo bax ay isugu soo baxeen dad lagu qiyaasay 10 kun oo ruux.

Xukunka Maxkamada, ayaa dhacay gelinkii dambe ee Arbacadii shalay, waxaana xukunka walaac ka muujiyay waalidiinta dhalay ninka dhalinyarada ah.

Hooyo Maryan Maxamed, ayaa Garsooraha ka codsatay inuu xukunka u qafiifiyo wiilkeeda, balse uu ka horyimid.

 

 

 

 

Himilo Media