Hargeysa (Himilo) Wasiirka wasaaradda Maaliyadda Jamhuuriyadda Somaliland Cabdicasiis Maxamed Samaale ayaa cadeeyey damaciisa siyaasadeed ee mustaqbalka waxaanu ku dhawaaqay inuu isu soo taagi doono tartanka jagada Madaxweynaha ee xisbiga Kulmiye dhexdiisa xilliga madaxweyne silaanyo ka dib.
Wasiir Samaale oo maanta warbaahinta ugu waramayey xafiiskiisa ayaa ka hadlay arrimo la xidhiidha damaciisa siyaasadeed, heerka axsaabta qaranka iyo waliba jagada guddoomiyaha xisbiga kulmiye.
Wasiir Samaale oo ka hadlay xaalada axsaabta siyaasada somaliland ayaa waxa uu yidhi:- “dalka somaliland waxa ka hirgalay nidaamka dimuqraadiyada ee ku salaysan axsaabta tirada badan waxaana samaysmay axsaabta Ucid, Kulmiye iyo Udub balse isbedelkii ka yimid doorashooyinkii dalka ka qabsoomay ayaa waxa saaxada siyaasada ka baxay xisbigii Udub oo ahaa xisbigii ugu weynaa oo ay ku jireen haldoorkii somaliland, balse waxay ku kala biireen siyaasiyiintaasi saddexda xisbi ee haatana jira ee kala ah Kulmiye,Ucid iyo Waddani, ninba kii uu u arkay in siyaasadiisu ka dhex shaqayn karto, sidaasi awgeed
Nidaamka axsaabta ee dalkeena ka jiraa waa nidaamka aynu jecelnahay in aqoonyahanka iyo dadka wanaagsan ee aragtida dheer lihi ku soo baxaan, oo aynu kaga baxno nidaamka qabiilka oo aanu qofku wax ku doonin reer hebel baan ahay, balse uu wax ku doono annigaa wax ah, oo aqoontan ayaan leeyahay iyo waxaas ayaan ummadda u qabanayaa, dabadeedna ummaddu sidaa codka ku siiso”.
Wasiir Samaale oo hadalkiisa sii wata ayaa waxa kale oo uu sheegay “waxaan ka mid ahaa aasaasayaashii xisbiga kulmiye, waxaanan ka mid noqday xubnihii ummaddu dooratay golaha wakiilada doorashadii ugu horeysay ee golaha wakiilada, waxaanan xisbiga kulmiye uga soo baxay hargeysa, ka dibna waxaan noqday guddoomiye ku xigeenka koowaad ee golaha wakiilada, maantana waxaan ahay wasiirka maaliyada waxaanan mar walba ahaa oo aan ahay xisbiga kulmiye, xilli walba salaada joogta ayaa la tukadaa, maanta qaranku madaxweyne ayuu leeyahay oo waa Axmed Maxamed Maxamuud (Silanyo), waxaanu dastuurku siinayaa inuu tartami karo laba jeer, teeramkii koowaad ee shanta sanadood ahaa ee Silaanyo madaxweynaha la doortayna wali muu dhamaan, waxaanu ku eeg yahay 15ka july 2015, islamarkaana waxa uu xaq u leeyahay inuu mar labaad isa soo sharaxo, isagaanay ku xidhan tahay oo annigu ka hadli maayo”.
Wasiir Samaale waxa kale oo uu ku dhawaaqay damaciisa siyaasadeed ee mustaqbalka waxaanu yidhi:-
“annigu hore ayaan u sheegay haatana dib ayaan idiinku celinayaa, annigu dalka waxaan rabaa inaan madaxweyne ka noqdo marka teeramka labaad ee madaxweyne silaanyo dhamaado, ama uu silaanyo haakah yidhaahdo, waxase ay taasi ku xidhan tahay tartan xisbiga dhexdiisa iyo axsaabta kaleba ah. Waxaanse maanta ku taageersanahay walaalkay Muuse Biixi inuu yahay guddoomiyaha xisbiga kulmiye, oo waan uga hadhay oo kulama tartamayo waanan ku taageerayaa guddoomiyenimada xisbiga kulmiye iyadoo dhawaan shirweynaha soo socda lagu dooranayo, laakiin wixii kale wali lama gaadhin oo waa mustaqbalka”.
Himilomedia.com
Hargeysa-Somaliland
No comments:
Post a Comment